கிளசரின் இல்லாமலேயே அழுவேன்!

மாடலிங் மூலம் பாலிவுட் சினிமாவில் இடம் பிடித்த அனுஷ்கா ஷர்மா தான் நடிக்கும் திரைப்படங்களில் வரும் சோக காட்சிகளுக்கு கிளசரின் போட்டு அழுததேயில்லையாம்.

""எனது 15-வது வயதில் மாடலிங்கில் நுழைய வேண்டும் என்ற ஆசை ஏற்பட்டது. அதற்குக் காரணம் என் தோழி ஒருத்தியின் புகைப்படம் ஒரு மாத இதழில் வெளிவந்திருந்தது. அதைப் பார்த்ததும் என் புகைப்படமும் இதழில் வெளிவர ஆசை வந்தது.

மாடலிங்கில் துறையில் நுழைந்த சமயம், எனக்கு சினிமாவில் நடிக்க ஆர்வம் இல்லை. முதன்முதலில் திரைப்படத்தில் நடிப்பதற்கான ஸ்கிரீன் டெஸ்டில் விருப்பமில்லாமல்தான் கலந்து கொண்டேன். சாதாரண உடையையே அணிந்து சென்றேன். அதன் பின்பு ஒரு டயலாக் கொடுத்து அதை பேசி நடிக்கச் சொன்னபோது, நாளைக்கு வந்து நடித்துக் காட்டுகிறேன் என்று கூறி சென்றுவிட்டேன். இதுவரை ஓர் "அயிட்டம் சாங்'கிற்கு கூட ஆடியதில்லை; அதில் எனக்கு விருப்பமும் இல்லை.

காதல், திருமணம் போன்றவற்றில் என் குடும்பத்தைப் போன்றுதான் இருக்க ஆசைப்படுகிறேன். ஆனால் சினிமா துறையில் இருப்பவர்களுக்கு திருமணம் செய்து கொண்டு அதிக நாள்கள் ஒருவருடனேயே வாழ்க்கையை நடத்துவது என்பது கஷ்டமான காரியமாக இருக்கிறது. டேட்டிங் கலாசாரம்தான் எங்கும் பரவிக் கிடக்கிறது. என்னைப் பொருத்தவரையில், சினிமா அல்லாத துறையைச் சார்ந்தவர்தான் எனக்குத் துணையாக வர வேண்டும் என்று விரும்புகிறேன். ஏனென்றால் அவர்கள்தான் உறுதியோடும், உண்மையோடும் இருப்பார்கள். மாறாக சினிமா நடிகர்களுக்கு தங்கள் மீதான காதல் தான் மேலோங்கி இருக்கும்'' என்கிறார் அனுஷ்கா ஷர்மா.