பிஸ்கட் அல்வா

நாகஜோதி கிருஷ்ணன்

தேவையான பொருள்கள்:

பிஸ்கட் - 4 பெரிய பாக்கெட்டுகள்

கோதுமை மாவு - 3 மேசைக்கரண்டி

நெய் - அரை கிண்ணம்

பால் - 3/4 லிட்டர்

சர்க்கரை, பாதாம் - தேவையான அளவு

முந்திரிப் பருப்பு-10

செய்முறை:

பிஸ்கட்டை மிக்சியில் போட்டு பொடி செய்துகொள்ளவும். தேவையான பொருள்களைத் தயாராக எடுத்து வைக்கவும். நான்ஸ்டிக் வாணலியில் கால் கிண்ணம் நெய் ஊற்றி கோதுமை மாவை நெய்யில் சேர்த்து மாவு பொன்னிறமாகும் வரை வறுக்கவும். கோதுமை மாவு பொன்னிறமானதும் பொடித்த பிஸ்கட் சேர்த்து கிளறவும்.

மாவும், பிஸ்கட் பொடியும் நன்கு கலந்ததும் சிறிது சிறிதாக பால் சேர்த்துக் கிளறவும். கோதுமை மாவு, பிஸ்கட் கலவை பாலுடன் நன்கு கலந்ததும் அரை கப் சீனி சேர்த்துக் கிளறவும். நடு நடுவே ஒரு மேசைக்கரண்டி நெய் சேர்த்துக் கிளறவும். நெய் முழுவதும் அல்வாவில் சேர்த்து முந்திரிப் பருப்பு சேர்க்கவும். அல்வா வாணலியில் ஒட்டாமல் வரும்போது இறக்கவும். வேறு பாத்திரத்தில் அல்வாவை மாற்றி பாதாம் துண்டுகள் தூவிப் பரிமாறவும்.