கர்மவீரர்

முதல்வர் இருக்கையில் அமர்ந்தவர்

உப்புக் காய்ச்ச வேதாரண்யம் நடந்தவர்

நேருவுக்குப் பின் யாரெனக்கூற ஓடியவர்

எப்போதும் நேர்மையின் பக்கம் நின்றவர்!

கருப்பு நிறத்தவர்

வெள்ளை உள்ளத்தவர்

சிவப்புச் சிந்தனையாளர்

பச்சைத் தமிழர்!

படிக்கட்டும் குழந்தைகள் -அதுதான்

படிக்கட்டு முன்னேற என்றார்.

படிக்காதவர்தான் இவர் -ஆனால்

பாருக்கே பாடநூல் ஆனார்!

துண்டு போட்டதுண்டு

தோளில் - நாட்டில் அன்று

தூக்கி எறிந்ததுண்டு

பதவியை - பண்பை யன்று

இறப்பதற்கென்றே சிலர் பிறப்பார்

மறப்பதற்கென்றே சிலர் பிறப்பார்

மறப்பதற்கும் நாம் மறந்துவிட்ட

மாமனிதர் இவர்தான் காமராசர்.