ஒற்றுமை!

கலைவாணர் என்.எஸ்.கிருஷ்ணன், மனக்கசப்பு காரணமாக எம்.கே.தியாகராஜ பாகவதரிடம்(அந்த நாள் ஹீரோவாக்கும்!)

 பேசுவதில்லையென்று ஒரு "வதந்தி' உருவாகியிருந்தது! இதை அறிந்த கலைவாணர் ஓர் உபாயம் செய்தார். கலைவாணர் இல்ல விழா ஒன்றுக்கு எம்.கே.டி. வந்து கலந்து கொள்ளும் நிலை ஏற்பட்டது! அதை பயன்படுத்திக் கொண்ட என்.எஸ்.கே,  அங்கு வந்திருந்த பத்திரிகையாளர்களைக் கூப்பிட்டு, ""இதோ பாருங்கள்! நாங்க ஒற்றுமையாகவே இருக்கிறோம்! ஏன் தெரியுமா? என் மனைவி "மதுரம்'...ங..., நான் கிருஷ்ணன்...ஓ..., தியாகராஜ பாகவதர்...ப...! பார்த்தீர்களா...,ஒற்றுமையை!'' என்றதும் அனைவரும் சிரித்து கரகோஷம் செய்தனர்!

கே.என்.பாலகிருஷ்ணன்,

கும்பகோணம்.    

சரியான நேரம்!

தத்துவ ஞானி டயோஜினியிடம் ஒருவர் சாப்பிடுவதற்கு சரியான நேரம் எது என்று கேட்டார். அவர் "நீங்கள் ஒரு பணக்காரராக இருந்தால் விரும்பும்போதெல்லாம் சாப்பிடலாம். ஏழையாக இருந்தால் சாப்பாடு கிடைக்கும்போது சாப்பிடலாம்' என்றார்.

சரஸ்வதி பஞ்சு, திருச்சி.

முதுமையிலும் இளமை!

நோபல் பரிசு பெற்ற ஆல்பர்ட் சுவைட்சர் சிறந்த சிந்தனையாளர். சுயதொழில் செய்யும் ஒருவர் அவரிடம், ""எனக்கு வயதாகிவிட்டது. வேலை செய்ய முடியவில்லை'' என்றார்.

 ""என்னோடு வந்து வேலை செய்யுங்கள். உங்களை இளமையாக்கிக் காட்டுகிறேன்'' என்றார் சுவைட்சர். அப்போது சுவைட்சருக்கு வயது 74.

நெ.இராமன், சென்னை.