குத்து விளக்கு தந்த ஞான ஒளி!

 குத்து விளக்கின் பாகங்கள்
 கூடி ஒன்றாய்ச் சேர்ந்திடவே
 சத்தமாகப் பேசி அவை
 சண்டையிட்டுக் கொண்டனவே!
 
 கீழே உள்ள தட்டதுவும்
 கர்வத்தோடு சொல்லியது....
 ""தாழ்ந்து பணிந்து இவ்விளக்கைத்
 தாங்கிப் பிடிப்பது நான்தானே!....
 
 .... தாங்கிடும் நான்தான் இல்லையெனில்
 தடுமாறிக் கீழே விழுந்திடுவீர்!
 நீங்கள் நிலைத்திட இயலாது!
 நினைவில் வைத்துக் கொள்ளுங்கள்!''
 
 தலையுடன் காலை இணைக்கின்ற
 தண்டுப் பகுதி சொல்லியது,....
 ""மேலே இருக்கும் பகுதியையும்,
 கீழே தட்டுப் பகுதியையும்.....
 
 இணைத்துக் கோர்ப்பது நான்தானே!
 இதையும் நீங்கள் உணர்வீரே!
 பிரிந்து கிடக்கும் உங்களை நான்
 பாசத்தோடு சேர்க்கின்றேன்!''
 
 குத்துவிளக்கின் மேற்பகுதி
 குதித்துச் சினமுடன் சொல்லியது!
 சத்தம் எதுவும் இல்லாமல்
 பொத்திக் கொண்டு கேளுங்கள்!
 
 "ஐந்து முகங்களும் எனக்குத்தான்!
 அழகிய திரியும் எனக்குத்தான்!
 எண்ணெய் குளமும் எனக்குத்தான்''
 என்று கர்வப் பட்டதுவே!
 
 உரசிய தீயைத் தாங்கிய குச்சி
 திரியில் ஏற்றி ஒளி தரவே
 தீபம் அருளைப் பொழிய மனிதர்
 அருகில் வந்து வணங்கினரே!
 
 ஏற்றிய தீபம் ஞானத்தை
 உடனே தந்தது விளக்கிற்கு!
 ஒற்றுமைதான் மிக பலமென்று
 உலகில் சுடரொளி பரவியது!
 கடலூர் நா.இராதாகிருட்டிணன்.