வைரச் சுரங்கங்கள் அனைத்தையும் அரசுடைமையாக்க ஜிம்பாப்வே முடிவு

ஜிம்பாப்வேயில் அனைத்து வைரச் சுரங்கங்களையும் அரசு டைமையாக்க அந்த நாட்டு அரசு முடிவு செய்துள்ளது.
 இதுகுறித்து ஜிம்பாப்வே அதிபர் ராபர்ட் முகாபே வியாழக்கிழமை கூறியதாவது:
 நாட்டின் வைரச் சுரங்கத் துறை மூலம் ஜிம்பாப்வே அரசுக்குப் போதிய வருவாய் கிடைக்கவில்லை.
 வைரச் சுரங்கங்களிலிருந்து எவ்வளவு வைரம் வெட்டியெடுக்கப்படுகிறது, எவ்வளவு கடத்தப்படுகிறது என்பதை அறிந்து கொள்ள முடியாத நிலை உள்ளது.
 எனவே, அனைத்து சுரங்கங்களையும் அரசுடைமையாக்க முடிவு செய்துள்ளோம் என்றார் அவர். ஜிம்பாப்வேயின் மரேஞ்ச் பகுதியில் வைரப் படிமங்கள் இருப்பது கடந்த 2006-ஆம் ஆண்டு கண்டறியப்பட்டது.
 அந்த நாட்டின் நலிந்த பொருளாதாரத்தை சீர்தூக்க இந்த வைரங்கள் பயன்படும் என எதிர்பார்க்கப்பட்டது.
 ஆனால் சட்டவிரோதக் குழுக்கள் அந்தப் பகுதியில் வைரம் தோண்டும் செயலில் இறங்கியதால் 2008-ஆம் ஆண்டு ராணுவம் அந்தப் பகுதியை தனது கட்டுப்பாட்டுக்குள் கொண்டு வந்தது.
 இந்த நடவடிக்கையில் 200-க்கும் மேற்பட்டோர் உயிரிழந்ததாக மனித உரிமைகள் அமைப்புகள் தெரிவிக்கின்றன.
 மேலும், சுரங்கத் தொழிலாளர்களை கொலை செய்தல், துன்புறுத்தல் உள்ளிட்ட பல்வேறு மனித உரிமைப் புகார்களால் ஜிம்பாப்வே வைர ஏற்றுமதிக்கு 2009 முதல் 2011-ஆம் ஆண்டு வரை சர்வதேசத் தடை விதிக்கப்பட்டது.
 தற்போது அந்தத் தடை விலக்கப்பட்டிருந்தாலும், நாட்டின் வைர உற்பத்தி வீழ்ச்சியடைந்து வருகிறது.
 2014-ஆம் ஆண்டு 6.6 லட்சம் கேரட்டுகளாக இருந்த ஜிம்பாப்வேயின் வைர உற்பத்தி, 2015-ஆம் ஆண்டு 4.2 லட்சம் கேரட்டுகளாகக் குறைந்தது. இந்தச் சூழலில் வைரச் சுரங்கங்களை அரசுடைமையாக்க அதிபர் முகாபே முடிவு செய்துள்ளார்.