உணவகத்தில் சிலிண்டர் வெடித்து விபத்து: 77 பேர் படுகாயம்!

ஸ்பெயின் நாட்டில் நடைபெற்ற  விழா ஒன்றின் போது, அங்குள்ள உணவகம் ஒன்றின் சமையலறையில் கியாஸ் சிலிண்டர் வெடித்த விபத்தில் 77 பேர் படுகாயம் அடைந்தனர்.

ஸ்பெயின் நாட்டின் தென்கடலோரப் பகுதியில் உள்ள மலாகா புகழ்பெற்ற சுற்றுலாத்தலமாகும். இதன் அருகே உள்ள வேலேஸ்-மலாகா என்ற நகரில் சனிக்கிழமையன்று உள்ளூர்விழா ஒன்று நடந்து கொண்டிருந்தது.

விழாவில் கலந்து கொண்டவர்கள் இங்குள்ள ’லா போஹேமியா’ என்ற உணவகத்தில் சாப்பிட திரண்டிருந்தனர்.  அப்போது, உணவகத்தின் சமையல் அறையில் உள்ள எரிவாயு சிலிண்டரில் கசிவு ஏற்பட்டு திடீரென தீ பிடித்தது. இதை கண்ட உணவக ஊழியர்கள் மற்றவர்களை எச்சரிக்கை செய்தனர்.

அப்போது, பயங்கர சப்தத்துடன் கியாஸ் சிலிண்டர் வெடித்து சிதறியது. இந்தவிபத்தில் 77 பேர் படுகாயம் அடைந்தனர்.

காயமடைந்தவர்கள் உடனடியாக ஆம்புலன்ஸ் மூலம் மருத்துவமனைக்கு அழைத்துச் செல்லப்பட்டனர் மேலும் சிகிச்சை பெற்று வருபவர்களில் ஐந்துபேரின் நிலைமை கவலைக்கிடமாக உள்ளதாக கூறப்படுகிறது.