2021 ஜூன் வரை வீட்டில் இருந்தே பணியாற்றலாம்: கூகுள் அறிவிப்பு

கரோனா தொற்றுப் பரவல் காரணமாக ஊழியர்களின் பாதுகாப்பைக் கருத்தில் கொண்டு 2021 ஜூன் வரை வீட்டில் இருந்தே பணியாற்ற அமெரிக்காவை தலைமையிடமாகக் கொண்டு இயங்கும் கூகுள் நிறுவனம் அறிவித்துள்ளது.

அலுவலகம் வந்துதான் பணியாற்ற வேண்டும் என்ற அவசியம் இல்லாத பணியாளர்கள் 2021-ஆம் ஆண்டு ஜூன் மாதம் வரை வீட்டில் இருந்தே பணியாற்றலாம் என்று கூகுள் தனது ஊழியர்களுக்கு அனுமதி அளித்துள்ளது.

முன்னதாக, உலகம் முழுவதும் கரோனா தொற்றுப் பரவத் தொடங்கியதும், பல்வேறு முன்னணி நிறுவனங்கள் தங்களது ஊழியர்களை வீட்டில் இருந்தே பணியாற்ற அனுமதி அளித்தது. அதன்படி, கூகுள் ஊழியர்களும் வீட்டில் இருந்தே பணியாற்ற அனுமதிக்கப்பட்டனர்.

எனினும், கரோனா தாக்கம் குறைந்ததும் கடந்த ஜூன் மாதத்தில் அலுவலகங்களை திறக்க கூகுள் திட்டமிட்டிருப்பதாக கடந்த மே மாதம் அறிவித்தது. ஆனால், பெரும்பாலான ஊழியர்கள் இந்த ஆண்டு இறுதி வரை வீட்டில் இருந்தே பணியாற்ற விருப்பம் தெரிவித்திருந்தனர்.

இந்த நிலையில், இந்த ஆண்டு இறுதி வரை அலுவலகம் வந்துதான் பணியாற்ற வேண்டும் என்ற அவசியம் இல்லாத ஊழியர்கள் அனைவரும் வீட்டில் இருந்தே பணியாற்ற அனுமதிக்கப்பட்டிருந்தனர்.

இந்த நிலையில், கூகுள் நிறுவனத்தின் தலைமை நிறுவனமான அல்ஃபாபெட்-டின் தலைமை நிர்வாக அதிகாரி சுந்தர் பிச்சை, நிறுவனத்தின் முக்கியக் குழு செயல் உறுப்பினர்களுடன் கடந்த வாரம் ஆலோசனை நடத்தி, 2021, ஜூன் வரை அனைத்து ஊழியர்களும் வீட்டில் இருந்தே வேலை செய்ய அனுமதி வழங்குவது என்று முடிவெடுத்து அறிவித்துள்ளார்.

இது பற்றி வெளியிடப்பட்டிருக்கும் அறிவிப்பில், தற்சமயம் பணியாளர்களால் வீட்டில் இருந்தபடியே வேலை செய்ய முடியும் என்ற நிலையில் இருப்பவர்கள், வீட்ல் இருந்தே பணியாற்றும் காலத்தை வரும் 2021, ஜூன் 30 வரை நீட்டிக்கப்பட்டிருப்பதாக அறிவிக்கப்பட்டுள்ளது.

தனது ஊழியர்களுக்கும் இது பற்றி மின்னஞ்சல் வாயிலாக தகவல் தெரிவிக்கப்பட்டுள்ளது.