தலிபான்களுக்கு ஆதரவாக குவிந்த ஆயிரத்திற்கும் மேற்பட்ட மக்கள்; காரணம் என்ன தெரியுமா?

ஆப்கானிஸ்தானில் தலிபான்கள் ஆட்சி அமைத்ததை கொண்டாடும் விதமாக காபூலுக்கு வடக்கே உள்ள மைதானத்தில் நடைபெற்ற பேரணியில் ஆயிரத்திற்கும் மேற்பட்ட தலிபான்கள் ஆதரவாளர்கள் கலந்து கொண்டனர். 

ஆப்கன் தலைநகரின் புறநகரில் அமைந்துள்ள கோதமானில் நடைபெற்ற இந்த கூட்டத்தில் தலிபான் அமைப்பின் அதிகாரிகள் கலந்து கொண்டனர். இதில், பெண்கள் யாரும் கலந்து கொள்ளவில்லை. ஏழு வாரங்களுக்கு முன்பு, காபூலை தலிபான்களை கைபற்றியதைத் தொடர்ந்து நடைபெறும் முதல் தலிபான் ஆதரவு கூட்டம் இதுவாகும்.

கூட்டத்தின் இறபுறமும், தலிபான்கள் துப்பாக்கி ஏந்தியபடி பாதுகாப்பில் நின்றுக் கொண்டிருக்க, பந்தலுக்கு கீழே நாற்காலியில் அமர்ந்திருந்த மக்கள், தலிபான் அதிகாரிகள் ஆற்றிய உரையை கேட்டனர். கூட்டம் தொடங்குவதற்கு முன்பாக, கொடி, ராக்கெட் ஏவுகணைகள் உள்பட ஆயுதங்களை ஏந்தியபடி தலிபான்கள் அணிவகுப்பு நடத்தினர்.

பதாகைகளை ஏந்தியபடியும் சிவப்பு, வெள்ளை தலைபாகைகள் அணிந்தும் அங்கு கூடியிருந்தவர்கள் தலிபான்களுக்கு ஆதரவு தெரிவித்தனர். முன்னதாக, மக்கள் கூட்டத்திற்கு வரும்போது, அங்கு தலிபான்களை கொண்டாடும் விதமாக பாடல்கள் ஒலிக்கப்பட்டது. கூட்டம் நடைபெறும் இடத்திற்கு லாரியில் வந்திறங்கிய சிலர் தலிபான் ஆதரவு கோஷம் எழுப்பினர். 

கூட்டத்தில் அமைக்கப்பட்டிருந்த மேடைக்கு முன்பிருந்த பகுதிக்கு வந்திருந்த ஒரு சிலர் 'அல்லாஹ் அக்பர்' என முழங்கினர். கடந்த வியாழக்கிழமை, சிறுமிகளின் கல்விக்கு ஆதரவாக பெண்கள் நடத்திய போராட்டத்தை தலிபான்கள் துப்பாக்குச்சூடு நடத்தில் கலைத்தனர். உயர் நிலை பள்ளிகளில் படிக்க சிறுமிகளுக்கு மீண்டும் அனுமதி வழங்கக் கோரி கிழக்கு காபூலில் உள்ள உயர் நிலை பள்ளிக்கு வெளியே பெண்கள் போராட்டத்தில் குதித்தனர்.

இதையும் படிக்க | போராட்டக் களத்தில் இறங்கிய பெண்கள்; துப்பாக்கிச்சூடு நடத்திய தலிபான்கள்

போராட்டத்தை முன்னெடுத்து செல்ல பெண்கள் முற்பட்டபோது தலிபான்கள் அவர்களை பின்னுக்கு தள்ளினர். இதை விடியோ எடுக்க முயன்ற வெளிநாட்டு பத்திரிகையாளருக்கு குண்டு அடிப்பட்டது குறிப்பிடத்தக்கது.