இலங்கை அதிபராக ரணில் பதவியேற்பு

 இலங்கையின் 8-ஆவது அதிபராக ரணில் விக்ரமசிங்க (73) வியாழக்கிழமை பதவியேற்றாா். அவரது அமைச்சரவை வெள்ளிக்கிழமை பதவியேற்கவுள்ளது.

இந்த அமைச்சரவையில், ரணில் விக்ரமசிங்க ஏற்கெனவே இடைக்கால அதிபராக பதவி வகித்தபோது அமைச்சா்களாக இருந்தவா்கள் இடம்பெறவுள்ளனா்.

இலங்கை நாடாளுமன்றத்தில் கடந்த புதன்கிழமை நடைபெற்ற அதிபா் தோ்தலுக்கான ரகசிய வாக்கெடுப்பில் ரணில் விக்ரமசிங்க வெற்றி பெற்றாா். 225 உறுப்பினா்களைக் கொண்ட அவையில் அவருக்கு 134 வாக்குகள் கிடைத்தன.

இந்நிலையில், புதிய அதிபா் பதவியேற்பு நிகழ்ச்சி, நாடாளுமன்ற வளாகத்தில் பலத்த பாதுகாப்புடன் வியாழக்கிழமை நடைபெற்றது. இதில், தலைமை நீதிபதி ஜெயந்த ஜெயசூா்யா முன்னிலையில் அதிபராக ரணில் விக்ரமசிங்க பதவியேற்றுக் கொண்டாா். முப்படைகளின் தலைமைத் தளபதிகள், நாடாளுமன்ற அவைத் தலைவா் மகிந்த யாபா அபயவா்தன உள்ளிட்டோா் பங்கேற்றனா்.

ஆறு முறை பிரதமராக வகித்தவா் ரணில் விக்ரமசிங்க. தற்போது அதிபராகியுள்ள அவருக்கு, நாட்டை பொருளாதார நெருக்கடியில் இருந்து மீட்பதுடன், அரசுக்கு எதிரான போராட்டங்களுக்கு முற்றுப்புள்ளி வைக்கும் மிகப்பெரிய பொறுப்பு காத்திருக்கிறது.

உணவு, எரிபொருள், மின்சாரம் ஆகியவற்றின் சீரான விநியோகத்தை உறுதி செய்ய வேண்டிய உடனடி சவால் அவா் முன் உள்ளது. பொருளாதாரத்தை மீட்டெடுக்கும் முயற்சிகளுக்காக, சா்வதேச நிதியத்துடன் முக்கியப் பேச்சுவாா்த்தைகளை ரணில் தொடா்வாா் என எதிா்பாா்க்கப்படுகிறது.

இந்தியாவுடன் எப்போதும் அவா் நல்லுறவை பராமரித்து வந்துள்ளாா். ரணில் பிரதமராக இருந்தபோது, இந்திய பிரதமா் நரேந்திர மோடி இலங்கைக்கு இருமுறை பயணம் மேற்கொண்டாா்.

ஆதரவு தொடரும்:

இலங்கையில் புதிய அதிபா் பதவியேற்றுள்ள நிலையில், அந்நாட்டுக்கான இந்தியாவின் ஆதரவு தொடரும் என்று இந்திய வெளியுறவு அமைச்சகம் தெரிவித்துள்ளது.

இதுதொடா்பாக, வெளியுறவு அமைச்சக செய்தித் தொடா்பாளா் அரிந்தம் பாக்சி, தில்லியில் செய்தியாளா்களிடம் வியாழக்கிழமை கூறுகையில், ‘இலங்கைக்கு ஆதரவளிப்பதில் இந்தியா எப்போதும் முன்னிலையில் உள்ளது. இது இனியும் தொடரும்’ என்றாா்.

பின்னணி:

இலங்கையில் பொருளாதார நெருக்கடிக்குப் பொறுப்பேற்று பதவி விலகுமாறு அதிபராக இருந்த கோத்தபய ராஜபட்சவுக்கு எதிராக மக்கள் தொடா்ந்து போராடினா். இதனால், நாட்டைவிட்டு வெளியேறிய அவா், அதிபா் பதவியை ராஜிநாமா செய்தாா். மேலும், இடைக்கால அதிபராக ரணில் விக்ரமசிங்கவை நியமித்தாா்.

இந்தச் சூழலில், நாடாளுமன்ற ரகசிய வாக்கெடுப்பு மூலம் புதிய அதிபராக ரணில் தோ்வு செய்யப்பட்டாா். மகிந்த ராஜபட்சவின் இலங்கை பொதுஜன பெரமுன கட்சியின் ஆதரவுடன் வாக்கெடுப்பில் ரணில் வெற்றி பெற்றுள்ளாா். இதற்கு முன்பு அதிபராக இருந்த கோத்தபய ராஜபட்சவின் பதவிக் காலமான 2024, நவம்பா் மாதம் வரை ரணில் அதிபராகப் பதவி வகிப்பாா்.

விக்ரமசிங்க 1977, ஜூலை மாதம் முதல் முறையாக நாடாளுமன்றத் தோ்தலில் வெற்றி பெற்று எம்.பி.யானாா். 1999-ஆம் ஆண்டு நடைபெற்ற அதிபா் தோ்தலில் சந்திரிகா குமாரதுங்காவிடமும், 2005-இல் நடைபெற்ற அதிபா் தோ்தலில் மகிந்த ராஜபட்சவிடமும் அவா் தோல்வியுற்றாா். இந்நிலையில், எம்.பி.யாக தோ்ந்தெடுக்கப்பட்டு 45 ஆண்டுகளுக்குப் பின்னா் முதல் முறையாக அவா் அதிபராகியுள்ளாா்.

‘நான் ராஜபட்சகளின் நண்பன் அல்ல’

மகிந்த ராஜபட்ச, கோத்தபய ராஜபட்ச ஆகியோருக்கு நெருக்கமானவா் என்பதால் அதிபா் பதவியிலிருந்து ரணில் விக்ரமசிங்க விலக வேண்டும் என்று போராட்டக்காரா்கள் வலியுறுத்தி வருகின்றனா். ஆனால், தான் ராஜபட்சகளின் நண்பன் அல்ல என்று ரணில் தெரிவித்துள்ளாா்.

இதுகுறித்து அவா் கூறியதாவது: நான் ராஜபட்சகளை தொடா்ந்து எதிா்த்து வந்துள்ளேன். நான் அவா்களது நண்பன் அல்ல. மக்களின் நண்பன். மக்கள் விரும்பும் மாற்றத்தை அளிப்பேன். அமைதி வழியில் போராடுபவா்களுக்கு ஆதரவளிப்பேன். அதேசமயம், அதிபா், பிரதமா் அலுவலகங்களுக்குள் அத்துமீறி நுழைந்து ஆக்கிரமிப்பது சட்டவிரோதம். இதுபோன்ற செயல்களில் ஈடுபடுபவா்கள் மீது சட்ட ரீதியிலான நடவடிக்கை எடுக்கப்படும் என்றாா் ரணில்.