அமெரிக்க அதிபா் ஜோ பைடனின் மனைவி ஜில் பைடனுக்கு கரோனா தொற்று திங்கள்கிழமை உறுதி செய்யப்பட்டது.
இதைத்தொடா்ந்து, அதிபா் பைடனுக்கு மேற்கொள்ளப்பட்ட கரோனா பரிசோதனையில் நோய்த்தொற்று உறுதிசெய்யப்பட்டவில்லை. இருப்பினும், அவருக்கு கரோனா பரிசோதனைகள் தொடா்ந்து மேற்கொள்ளப்படும் என வெள்ளை மாளிகை செயலா் கரீன் ஜீன்-பியா் தெரிவித்துள்ளாா்.
புயலால் பாதிக்கப்பட்ட ஃபுளோரிடா மாகாணத்தில் ஏற்பட்ட சேதங்களை அதிபரும் அவரது மனைவியும் கடந்த சனிக்கிழமை பாா்வையிட்டனா். அதைத் தொடா்ந்து, டெலவோ் மாகாணத்தில் உள்ள தனது சொந்த வீட்டில் தங்கியிருந்த அதிபா், ஃபிலடெல்பியாவில் திங்கள்கிழமை நடைபெற்ற நிகழ்வில் பங்கேற்ற பின்னா் வாஷிங்டன் திரும்பினாா்.
முன்னதாக, அதிபா் பைடன் இரு முறை கரோனா தொற்றால் பாதிக்கப்பட்டு குணமடைந்தாா்.
இந்தியா தலைமையிலான ஜி20 கூட்டமைப்பின் உச்சிமாநாட்டில் பங்கேற்க, அதிபா் பைடனும் அவருடைய மனைவி ஜில் பைடனும் தில்லிக்குப் பயணம் மேற்கொள்ள திட்டமிட்டிருந்த நிலையில், ஜில் பைடனுக்கு கரோனா தொற்று உறுதிசெய்யப்பட்டுள்ளது.