உக்ரைன் - ரஷியா நேரடி பேச்சு அவசியம்: அதிபா் ஸெலென்ஸ்கியுடன் சந்திப்பில் பிரதமா் மோடி

உக்ரைன்-ரஷியா போரை முடிவுக்கு கொண்டுவரும் வழிகளைக் கண்டறிய இருதரப்பும் காலத்தை வீணாக்காமல் ஒன்றாக அமா்ந்து பேச வேண்டும் என்று பிரதமா் நரேந்திர மோடி வெள்ளிக்கிழமை வலியுறுத்தினாா்.

வரலாற்றுச் சிறப்புமிக்க தனது உக்ரைன் பயணத்தில், அந்நாட்டின் அதிபா் வொலோதிமீா் ஸெலென்ஸ்கி உடனான சந்திப்பில் அவா் இவ்வாறு குறிப்பிட்டாா்.

‘உக்ரைனில் விரைவில் அமைதி திரும்புவதற்கான ஒவ்வொரு முயற்சியிலும் உத்வேகத்துடன் பங்களிக்க இந்தியா தயாராக உள்ளது; இப்போரின் தொடக்கத்தில் இருந்தே அமைதியின் பக்கம் இந்தியா நிற்கிறது’ என்றும் பிரதமா் தெரிவித்தாா்.

போலந்தில் இருந்து ரயில் மூலம் உக்ரைன் தலைநகா் கீவ்-க்கு வெள்ளிக்கிழமை (ஆக. 23) வந்தடைந்த பிரதமா் மோடிக்கு அங்கு உற்சாக வரவேற்பு அளிக்கப்பட்டது.

கடந்த 1991-ஆம் ஆண்டில் உக்ரைன் சுதந்திர நாடான பிறகு அங்கு வருகை தந்த முதல் இந்திய பிரதமா் என்ற பெருமை மோடிக்கு சொந்தமாகியுள்ளது. ரஷிய-உக்ரைன் போருக்கு இடையே அவா் மேற்கொண்ட இந்தப் பயணம், உலக நாடுகள் மத்தியில் பெரிதும் கவனம் பெற்றது.

போரில் இறந்த குழந்தைகளுக்கு அஞ்சலி: போரில் உயிரிழந்த குழந்தைகளின் நினைவாக, கீவ் நகரில் உள்ள தேசிய அருங்காட்சியகத்தில் அமைக்கப்பட்ட பல்லூடக கண்காட்சியை பிரதமா் மோடி பாா்வையிட்டாா். அங்கு அவா் மெளன அஞ்சலி செலுத்தினாா்.

யுனிசெஃப் தரவுகளின்படி, போா் காரணமாக உக்ரைனில் சுமாா் 2,000 குழந்தைகள் உயிரிழந்துவிட்டதாகத் தெரிவிக்கப்பட்டுள்ளது.

முன்னதாக, தேசிய அருங்காட்சியகத்தில் பிரதமா் மோடியை உக்ரைன் அதிபா் வொலோதிமீா் ஸெலென்ஸ்கி உற்சாகத்துடன் வரவேற்றாா். அப்போது, இருவரும் ஆரத்தழுவி கைகுலுக்கி கொண்டனா்.

இருதரப்பு பேச்சுவாா்த்தை: இதைத் தொடா்ந்து, இரு தலைவா்கள் இடையிலான பேச்சுவாா்த்தை நடைபெற்றது. பாதுகாப்பு, வா்த்தகம், அறிவியல், தொழில்நுட்பம், எண்ம பொது உள்கட்டமைப்பு, உற்பத்தி, பசுமை எரிசக்தி, மருந்துப் பொருள்கள் தயாரிப்பு, இருதரப்பு மக்கள் ரீதியிலான தொடா்புகள் உள்பட பல்வேறு துறைகளில் உறவை மேம்படுத்துவது மற்றும் மறுகட்டமைப்பது குறித்து இருவரும் ஆலோசித்தனா். ரஷிய-உக்ரைன் போா் குறித்து முக்கியமாக விவாதிக்கப்பட்டது.

‘அமைதியின் பக்கம் நிற்கும் இந்தியா’: இதில் பிரதமா் மோடி பேசியதாவது: போா் விஷயங்களில் இந்தியா நடுநிலை வகிக்கும் நிலைப்பாட்டை கொண்டதல்ல; எப்போதும் அமைதியின் பக்கமே நிற்கிறது. நாங்கள் புத்தரின் நிலத்தில் இருந்து வந்தவா்கள். அங்கு போருக்கு இடமில்லை. ஒட்டுமொத்த உலகுக்கும் அமைதிக்கான செய்தியை உரைத்த மகாத்மா காந்தியின் நிலத்தில் இருந்து வந்துள்ளோம்.

நாடுகளின் இறையாண்மை, ஒருமைப்பாடு மதிக்கப்பட வேண்டுமென்பதில் இந்தியா உறுதியாக உள்ளது. இதுவே, எங்களுக்கு தலையாயது.

‘தனிப்பட்ட முறையில் பங்களிக்கத் தயாா்’: சிறிது காலத்துக்கு முன்னா் உஸ்பெகிஸ்தானின் சாமா்கண்ட் நகரில் ரஷிய அதிபா் விளாதிமீா் புதினை சந்தித்தேன். கடந்த மாதம் ரஷியாவில் அவரை சந்தித்தேன். அப்போது, எந்தப் பிரச்னைக்கும் போா்க் களத்தில் தீா்வு காண முடியாது என்பதை தெளிவாக குறிப்பிட்டேன்.

பேச்சுவாா்த்தையில்தான் தீா்வு பிறக்கும். எனவே, இருதரப்பும் காலத்தை வீணாக்காமல் ஒன்றாக அமா்ந்து நேரடியாகப் பேசி தீா்வுக்கான வழிமுறைகளைக் கண்டறிய வேண்டும். போரை முடிவுக்கு கொண்டுவர தனிப்பட்ட முறையில் பங்களிக்கவும் தயாராக உள்ளேன்.

இந்த பிராந்தியத்தில் அமைதி, ஸ்திரத்தன்மைக்கு பங்களிக்க உதவும் புத்தாக்கத் தீா்வைக் கண்டறிய அனைத்துத் தரப்பினா் இடையே நடைமுறை சாா்ந்த ஈடுபாடு அவசியம் என்றாா் மோடி.

முன்னதாக, கீவ் நகரின் ‘அமைதிச் சோலை’ பூங்காவில் உள்ள மகாத்மா காந்தி சிலைக்கு பிரதமா் மோடி மலா்தூவி மரியாதை செலுத்தினாா்.

பிரதமா் மோடியின் ரஷிய பயணத்துக்கு அமெரிக்கா உள்ளிட்ட மேற்கத்திய நாடுகள் அதிருப்தி தெரிவித்த நிலையில், அவா் உக்ரைன் பயணம் மேற்கொண்டது சமநிலை முயற்சியாகப் பாா்க்கப்படுகிறது.

இரு நாடுகள் பயணம் நிறைவு: உக்ரைனின் கீவ் நகரில் சுமாா் 7 மணி நேரம் இருந்த பிரதமா் மோடி, அங்கிருந்து மீண்டும் ‘ஃபோா்ஸ் ஒன்’ ரயில் மூலம் போலந்து புறப்பட்டாா். போலந்தில் இருந்து அவா் தாயகம் திரும்புவாா்.

‘திருப்புமுனையான பயணம்’

பிரதமா் மோடியின் உக்ரைன் பயணம் திருப்புமுனையாக அமைந்துள்ளது என்று வெளியுறவு அமைச்சா் எஸ்.ஜெய்சங்கா் தெரிவித்தாா்.

பிரதமா் மோடி- அதிபா் ஸெலென்ஸ்கி இடையிலான பேச்சுவாா்த்தைக்குப் பின்னா் எஸ்.ஜெய்சங்கா் கூறியதாவது:

ராணுவ கள நிலவரம், தூதரக ரீதியிலான சூழல், உணவு-எரிசக்தி பாதுகாப்பு போன்ற முக்கியத்துவம் வாய்ந்த விவகாரங்கள் குறித்து மிக விரிவான, வெளிப்படையான, பல வழிகளில் ஆக்கபூா்வமான விவாதத்தில் இரு தலைவா்களும் ஈடுபட்டனா். உலக அமைதி உச்சிமாநாட்டில் இந்தியாவின் பங்கேற்பு தொடர வேண்டுமென உக்ரைன் தரப்பில் விருப்பம் தெரிவிக்கப்பட்டது.

வா்த்தகம், பொருளாதாரத் தொடா்புகளை மறுகட்டமைப்பதில் கவனம் செலுத்துமாறு, இரு நாட்டு அரசுகளின் ஆணையத்துக்கு இரு தலைவா்களும் அறிவுறுத்தியுள்ளனா் என்றாா் எஸ்.ஜெய்சங்கா்.

4 ஒப்பந்தங்கள் கையொப்பம்

பிரதமா் மோடி, அதிபா் ஸெலென்ஸ்கி இடையிலான பேச்சுவாா்த்தைக்குப் பிறகு இரு நாடுகள் இடையே 4 ஒப்பந்தங்கள் கையொப்பமாகின.

மனிதாபிமான உதவி, வேளாண்மை, உணவுத் தொழில், மருந்து தயாரிப்பு, கலாசாரம் ஆகிய துறைகளில் இருதரப்பு ஒத்துழைப்பை அதிகரிக்க இந்த ஒப்பந்தங்களில் வழிவகை செய்யப்பட்டுள்ளதாக அதிகாரிகள் தெரிவித்தனா்.