கலிஃபோா்னியா பல்கலை.: பாலஸ்தீன ஆதரவு ஆா்ப்பாட்ட முகாம் அகற்றம்

அமெரிக்காவின் கலிஃபோா்னியா பல்கலைக்கழகத்தில் பாலஸ்தீனத்துக்கு ஆதரவாக ஆா்ப்பாட்டம் நடத்திவந்த மாணவா்களின் முகாம்களை கலவரத் தடுப்பு போலீஸாா் வலுக்கட்டாயமாக அகற்றினா்.

அந்த நடவடிக்கைக்கு எதிா்ப்பு தெரிவித்த சுமாா் 100 மாணவா்கள் கைது செய்யப்பட்டனா்.

காஸா போரில் பாலஸ்தீனத்துக்கு ஆதரவாக அமெரிக்க கல்லூரி மாணவா்கள் கடந்த 2 வாரங்களுக்கு முன்னா் தொடங்கிய போராட்டம் நாளுக்கு நாள் வலுவடைந்துவருகிறது.

இந்த நிலையில், கலிஃபோா்னியா மாகாணம், லாஸ் ஏஞ்சலீஸ் நகரிலுள்ள பல்கலைக்கழகத்தில் பாலஸ்தீனத்துக்கு ஆதரவாக ஏராளமான மாணவா்கள் ஆா்ப்பாட்டத்தில் ஈடுபட்டனா்.

அங்குள்ள ஹாமில்டன் அரங்கில் தடுப்புகள் அமைத்து அவா்கள் உள்ளிருப்புப் போராட்டத்தில் செவ்வாய்க்கிழமை ஈடுபட்டனா்.

ஏற்கெனவே, அமெரிக்காவின் சிவில் உரிமைப் போராட்டத்தின் போதும் வியத்நாம் போா் எதிா்ப்ாட்டத்தின்போதும் போராட்டக் களமாகத் திகழ்ந்த அந்த அரங்கிலிருந்து ஆா்ப்பாட்டக்காரா்களை போலீஸாா் புதன்கிழமை அதிகாலை வெளியேற்றினா்.

வெளியேற்றப்பட்ட மாணவா்கள் மீது இஸ்ரேலுக்கு ஆதரவாக போட்டி ஆா்ப்பாட்டத்தில் ஈடுபட்ட மாணவா்கள் தாக்குதல் நடத்தினா். அதையடுத்து, இரு தரப்பினரும் கடுமையாக மோதிக் கொண்டனா். அவா்களை 2 மணி நேரமாகப் போராடி போலீஸாா் பிரித்தனா்.

இந்த வன்முறைச் சம்பவம் தொடா்பாக சுமாா் 300 மாணவா்களை போலீஸாா் கைது செய்தனா். எனினும், பல்கலைக்கழக வளாகத்துக்குள் முகாம்கள் அமைத்தும், அந்த முகாமுக்கு அரணாக ஏராளமான தடுப்புகளை அமைத்தும் பாலஸ்தீன ஆதரவாளா்கள் தொடா்ந்து ஆா்ப்பாட்டம் நடத்திவந்தனா்.

இந்த நிலையில், ஆா்ப்பாட்டக்காரா்களை கலைப்பதற்காக கலவரத் தடுப்பு நடவடிக்கைகளுக்குப் பயன்படுத்தப்படும் காவல்துறை சிறப்புப் பிரிவு வரவழைக்கப்பட்டது.

அவா்கள் கலிஃபோா்னியா பல்கலைக்கழக வளாகத்துக்குள் வியாழக்கிழமை அதிகாலை புகுந்து பாலஸ்தீன ஆா்ப்பாட்டக்காரா்கள் அமைந்திருந்த முகாம்களை அகற்றினா். இந்த நடவடிக்கையின்போது மாணவா்களுக்கும் கலவரத் தடுப்பு போலீஸாருக்கும் இடையே மோதல் ஏற்பட்டது. இது தொடா்பாக சுமாா் 100 மாணவா்கள் கைது செய்யப்பட்டதாக அதிகாரிகள் கூறினா்.

தங்கள் நாட்டில் தாக்குதல் நடத்தி, சுமாா் 1,200 பேரை படுகொலை செய்த ஹமாஸ் அமைப்பினரை ஒழித்துக்கட்டுவதாகக் கூறி, காஸா பகுதியில் இஸ்ரேல் நடத்திவரும் தாக்குதலில் இதுவரை 34,500-க்கும் மேற்பட்டவா்கள் உயிரிழந்துள்ளனா். அவா்களில் பெரும்பாலானவா்கள் குழந்தைகள், பெண்கள் உள்ளிட்ட பொதுமக்கள்.

இந்தப் போரில் இஸ்ரேல் கண்மூடித்தனமாக நடந்துகொள்வதாக விமா்சனங்கள் எழுந்துவரும் நிலையில், அந்த நாட்டுடனும் காஸா போரில் இஸ்ரேலுக்கு உதவும் நிறுவனங்களுடனும் இணைந்து செயல்படுவதை நிறுத்தவேண்டும் என்று பல்கலைக்கழகங்களை வலியுறுத்தி கடந்த ஏப்ரல் 17-ஆம் தேதியிலிருந்து அமெரிக்கா முழுவதும் மாணவா்கள் போராடிவருகின்றனா்.

தங்களது கோரிக்கைகளை வலியுறுத்தி பல்கலைக்கழக வளாகங்களுக்குள் முகாம்கள் அமைத்து மாணவா்கள் இந்தப் போராட்டத்தை நடத்திவருகின்றனா்.

இந்தச் சூழலில், கலிஃபோா்னியா பல்கலைக்கழக வளாகத்தில் பாலஸ்தீன ஆதரவாளா்களின் ஆா்ப்பாட்ட முகாம்கள் கலவரத் தடுப்பு போலீஸாரால் அகற்றப்பட்டது பரபரப்பை ஏற்படுத்தியுள்ளது.