அல்-ஜஸீரா தடை: போர் நிறுத்த பேச்சுவார்த்தையை எவ்வாறு பாதிக்கும்?

கத்தாரை தலைமையிடமாக கொண்ட அல்- ஜஸீரா செய்தி நிறுவனத்தின் இஸ்ரேல் அலுவலகங்களை மூடுவதாக இஸ்ரேலிய பிரதமர் பெஞ்சமின் நெதன்யாகு ஞாயிற்றுக்கிழமை தெரிவித்துள்ளார்.

இஸ்ரேலில் பிரிவினை தூண்டும் செயலில் அல்-ஜஸீரா ஈடுபடுவதாக இஸ்ரேல் குற்றம் சாட்டியுள்ளது. இதனை கடுமையாக மறுத்துள்ளது அல்-ஜஸீரா.

இஸ்ரேலின் அறிவிப்பையடுத்து கத்தார் அரசின் ஆதரவில் இயங்கும் அல்-ஜஸீரா செய்தி நிறுவனத்தின் ஒளிப்பரப்பு இஸ்ரேல் மற்றும் கிழக்கு ஜெருசலேமில் பிரதான கேபிள் வழங்குநரால் முடக்கப்பட்டுள்ளது.

இதற்கு முன்னர் தனிப்பட்ட செய்தியாளர்கள் மீது அரசு நடவடிக்கை எடுத்த போதிலும் வெளிநாட்டு செய்தி நிறுவனத்தையே முடக்குவது இஸ்ரேலில் இதுவே முதல்முறை.

கத்தார் தலைநகர் தோஹாவில் இருக்கும் செய்தி நிறுவனத்தின் தலைமையகம் இதற்கான உடனடி பதில்வினை வழங்கவில்லை.

அக்.7 போர் தொடங்கியது முதல் களத்திலிருந்து செயல்பட்டு வரும் பன்னாட்டு செய்தி நிறுவனமான அல்-ஜஸீரா, இஸ்ரேல் மற்றும் கிழக்கு ஜெருசலேத்தில் முடக்கப்பட்டுள்ளது, செய்தி நிறுவனத்தின் களச் செயல்பாடுகளை பாதிக்கும் என அந்நிறுவனத்தின் செய்தியாளர்கள் தெரிவித்து வருகின்றனர்.

இஸ்ரேல்- ஹமாஸ் இடையே போர் நிறுத்தத்துக்கான பேச்சுவார்த்தையில் மத்தியஸ்தம் மேற்கொண்டு வரும் கத்தாரின் முயற்சியையும் இஸ்ரேலின் இந்த நடவடிக்கை பாதிக்கும் என கருதப்படுகிறது.

கத்தார் உடனான நெதன்யாகுவின் உறவு சிக்கலாகி வருகிறது. குறிப்பாக போர் நிறுத்த உடன்படிக்கைகளை ஏற்க ஹமாஸுக்குப் போதிய அழுத்தம் கொடுக்கவில்லை என நெதன்யாகு கத்தார் மீது குற்றம் சாட்டினார். கத்தார் ஹமாஸின் தலைவர்களுக்கு பாதுகாப்பான இடமாக இருப்பதாகவும் அவர் முன்னர் குறிப்பிட்டார்.

அல்-ஜஸீரா செய்தி நிறுவனம் ஒருசார்பாக செயல்படுவதாக இஸ்ரேல் தொடர்ந்து குற்றம் சாட்டி வருகிறது.

2 ஆண்டுகளுக்கு முன்னர் அல்-ஜஸீரா செய்தி நிறுவனத்தின் செய்தியாளர் ஷிரீன் அபு அக்லே, ஆக்கிரமிக்கப்பட்ட மேற்குக் கரையில் இஸ்ரேல் ராணுவத்தால் கொல்லப்பட்டதையடுத்து இந்த உறவு மேலும் சிக்கலானது.

தெற்கு இஸ்ரேலில் அல்-ஜஸீராவின் ஒளிப்பதிவாளர் டிசம்பர் மாதத்தில் இஸ்ரேல் தாக்குதலில் கொல்லப்பட்டதாக செய்தி நிறுவனம் தெரிவித்துள்ளது.

இந்த நிலையில் இஸ்ரேல், ஹமாஸுடன் இணைந்து அல்-ஜஸீரா செயல்படுவதாகக் கூறி வருகிறது.