டிரம்ப்பை நீக்கிவிட்டு, அதிபர் பதவியில் ஜே.டி. வான்ஸ்: எலான் மஸ்க் வலியுறுத்தல்

அமெரிக்க அதிபர் டொனால்ட் டிரம்ப்புடன் நடந்து வரும் மோதலுக்கு இடையே, டெஸ்லா தலைமை நிர்வாக அதிகாரி எலான் மஸ்க், டிரம்பை பதவி நீக்கம் செய்து, துணைத் தலைவர் ஜே.டி. வான்ஸை அதிபராக்க வேண்டும் என்று வலியுறுத்தியிருக்கிறார்.

அமெரிக்க அதிபர் டிரம்ப்புக்கும் டெஸ்லா நிர்வாகி எலான் மஸ்க்குக்கும் இடையே ஏற்பட்டிருக்கும் கருத்து மோதல் உச்சக்கட்டத்தை எட்டியுள்து. அமெரிக்க அதிபர் பதவியிலிருந்து டொனால்ட் டிரம்பை பதவி நீக்க தீர்மானம் கொண்டுவந்து, துணை அதிபரை ஓவல் அலுவலகத்துக்கு அனுப்ப வேண்டும் என்று கூறியிருப்பது பலருக்கும் அதிர்ச்சியை ஏற்படுத்தியிருக்கிறது.

அமெரிக்காவின் 47வது அதிபரை பதவி நீக்கம் செய்ய வேண்டும் என்று தன்னுடைய எக்ஸ் பக்கத்தில் எலான் மஸ்க் பதிவிட்டுள்ளார். ஆனால், இந்தக் கருத்தை அவர் சுயமாகப் பதிவிடவில்லை. மலேசிய எழுத்தாளர் போட்ட பதிவுக்கு ஆம் என்றுதான் பதிலளித்துள்ளார்.

"அதிபர் vs எலான். யார் வெற்றி பெறுகிறார்கள்? என் பணம் எலானின் மீதுதான். டிரம்ப் பதவி நீக்கம் செய்யப்பட வேண்டும், அவருக்குப் பதிலாக ஜே.டி. வான்ஸ் நியமிக்கப்பட வேண்டும்," என்று மலேசியாவைச் சேர்ந்த வலதுசாரி எழுத்தாளர் இயன் மைல்ஸ் சியோங் வியாழக்கிழமை ஒரு எக்ஸ் பதிவில் கூறியிருந்தார். "ஆம்," என்று சுமார் 20 நிமிடங்களுக்குப் பிறகு சியோங்கின் பதிவுக்க எலான் மஸ்க் பதிலளித்திருக்கிறார்.

அமெரிக்க அதிபருக்கும் டெஸ்லா உரிமையாளருக்கும் இருந்த நல்லுறவு, வரி விதிப்பு மற்றும் செலவினங்கள் தொடர்பாக டொனால்ட் டிரம்ப் கொண்டு வந்த மசோதாவால் உடைந்து போனது. இதையடுத்தே பாலியல் குற்றவாளி எப்ஸ்டீன் தொடர்பான ஆவணங்கள் வரை எலான் மஸ்க்கால் இன்று அதிபருக்கு எதிராகக் கிளப்பப்பட்டது.

நாசா விண்வெளி நிறுவனத்தை வழிநடத்த ஒரு தொழில்நுட்ப நிபுணரின் ஆதரவைப் பெற்ற வேட்பாளருக்கான எனது ஆதரவை வாபஸ் பெற்றது உள்பட, தான் எடுத்த சில முடிவுகளுக்கு எலான் மஸ்க் ஏன் வருத்தப்பட்டார் என்பதைத் தன்னால் புரிந்து கொள்ள முடிந்தது என்றும் டிரம்ப் குறிப்பிட்டார்.