போலி ஜவுளி விற்பனை: ஒருவர் கைது

முன்னணி நிறுவனங்களின் பெயரில் போலி ஜவுளிகளை விற்பனை செய்த நபரை திங்கள்கிழமை கைது செய்த போலீஸார், அவரிடமிருந்து ரூ.25.38 லட்சம் மதிப்புள்ள போலி ஜவுளிகளை பறிமுதல் செய்தனர்.

பெங்களூரு அனுமந்தநகர் 2-ஆவது குறுக்குதெரு, 7-ஆவது முக்கியச் சாலையில் உள்ள கட்டடம் ஒன்றில், முன்னணி நிறுவனங்களின் பெயர்களில் போலி ஜவுளிகள் விற்பனை செய்வதாக போலீஸாருக்குத் தகவல் கிடைத்தது.

இதனையடுத்து, அங்கு சென்ற போலீஸார், போலி ஜவுளிகளை விற்பனை செய்த பசவனகுடி கிருஷ்ணா சாலையைச் சேர்ந்த பிரமோத்குமார் (22) என்பவரைக் கைது செய்து, அவரிடமிருந்து ரூ.25.38 லட்சம் மதிப்பிலான போலி ஜவுளிகளை பறிமுதல் செய்தனர். இதுகுறித்து, அனுமந்த நகர் போலீஸார் விசாரணை செய்து வருகின்றனர்.

வாடிக்கையாளர்களுக்குத் தேவையான

சேவைகளை வங்கிகள் வழங்க வேண்டும்

வாடிக்கையாளர்களுக்குத் தேவையான சேவைகளை வங்கிகள் வழங்க வேண்டும் என ஆக்சிஸ் வங்கியின் செயல் தலைவர் ராஜீவ் ஆனந்த் தெரிவித்துள்ளார்.

பெங்களூரில் திங்கள்கிழமை அவ் வங்கியின் சார்பில் வாடிக்கையாளர் சந்திப்பு நிகழ்ச்சியில் கலந்து கொண்டு அவர் பேசியது: சர்வதேச அளவில் அனைத்துத் துறைகளும் நவீனமாக மாறி வருகின்றன.

வங்கிகளிலும் விரைவான சேவையை வாடிக்கையாளர்கள் விரும்புகின்றனர். அதற்கு ஏற்ற வகையில், வங்கிகளும் தங்களது சேவைகளில் புதிய தொழில்நுட்பங்களை புகுத்தி வருகின்றன.

அதன்படி, வாடிக்கையாளர்களுக்குத் தேவையான சேவைகளை தேசிய, தனியார், கூட்டுறவு வங்கிகள் வழங்க வேண்டும். அண்மையில் ஆக்சிஸ் வங்கி சார்பில், லைம் என்ற புதிய செல்லிடப்பேசி செயலி அறிமுகம் செய்யப்பட்டுள்ளது.

இது போல பல சேவைகளை வாடிக்கையாளர்களுக்குத் தொடர்ந்து வழங்கிட முடிவு செய்துள்ளோம் என்றார்.