பெங்களூரில் இன்று இலவச சித்த மருத்துவ முகாம்

பெங்களூரில் வியாழக்கிழமை இலவச சித்த மருத்துவ முகாம் நடக்கவிருக்கிறது.

இதுகுறித்து மத்திய ஆயுஷ் அமைச்சகத்தின் கீழ் இயங்கும் பெங்களூரு சித்த மருத்துவ ஆராய்ச்சி மையம் வெளியிட்டுள்ள செய்திக் குறிப்பு:

மத்திய அரசின் ஆயுஷ் அமைச்சகத்தின் சித்த ஆராய்ச்சிக்கான மத்திய கவுன்சிலின் கீழ் பெங்களூரில் இயங்கும் சித்த மருத்துவ ஆராய்ச்சி மையத்தின் எட்டாம் ஆண்டு நிறுவன நாளை முன்னிட்டு இலவச சித்த மருத்துவ முகாம் நடத்த திட்டமிடப்பட்டுள்ளது.

பெங்களூரு, சிவாஜி நகா், குயின்ஸ் சாலையில் தினச்சுடா் அலுவலகத்தின் அருகேயுள்ள கா்நாடகத் தமிழ்ப் பத்திரிகையாளா் சங்க அலுவலகத்தில் வியாழக்கிழமை (ஜூன் 6) காலை 10.30 மணி முதல் மதியம் 2 மணி வரை சித்த மருத்துவ முகாம் நடத்தப்படுகிறது. இந்த முகாமில் நீரிழிவு, ரத்தக் கொதிப்பு உள்ளிட்ட பல நோய்களுக்கு இலவச மருத்துவ ஆலோசனையுடன் இலவசமாக மருந்தும் வழங்கப்படுகிறது.

இந்த வாய்ப்பை பயன்படுத்தி, தமிழரின் மருத்துவ முறையாம் சித்த மருத்துவத்தின் பலனை பெறுமாறு பொதுமக்களை கேட்டுக்கொள்கிறோம் என அதில் தெரிவிக்கப்பட்டுள்ளது.