2028 பேரவைத் தோ்தலிலும் காங்கிரஸ் வெற்றி பெறும்: கா்நாடக முதல்வா் டி.கே. சிவகுமாா்

அடுத்த பேரவைத் தோ்தலிலும் (2028) கா்நாடகத்தில் காங்கிரஸ் ஆட்சியமைக்கும் என முதல்வா் டி.கே. சிவகுமாா் நம்பிக்கை தெரிவித்தாா்.

கா்நாடகத்தில் காங்கிரஸ் அரசு ஆட்சிப் பொறுப்பேற்று 100 நாள்கள் நிறைவடைந்ததையொட்டி, பெங்களூரு விதான செளதாவில் வியாழக்கிழமை நடைபெற்ற ‘வலுவான கா்நாடகத்துக்கான உறுதி- நூற்றாண்டுப் பாதை, முன்னேற்றத் தோ்’ என்ற தலைப்பில் நடைபெற்ற நிகழ்ச்சியை முன்னாள் முதல்வரும், காங்கிரஸ் மூத்த தலைவருமான சித்தராமையா தொடக்கிவைத்தாா்.

விழாவில் முதல்வா் டி.கே. சிவகுமாா் பேசியதாவது:

காங்கிரஸ் கட்சியின் பலமே நாட்டின் பலம். காங்கிரஸ் கட்சியின் வரலாறே இந்தியாவின் வரலாறு; காங்கிரஸ் ஆட்சி பொறுப்பேற்கும் போதெல்லாம் நாட்டை மாற்றியமைக்கும் திட்டங்கள் செயல்படுத்தப்பட்டுள்ளன. ஜனநாயகத்தை வலுப்படுத்தியது முதல் தேசியக் கொடி, அரசமைப்புச் சட்டம், தேசிய கீதம் ஆகியவற்றை நாட்டுக்கு வழங்கியது வரை காங்கிரஸின் பங்களிப்பு உள்ளது.

நிலச் சீா்திருத்தம், நலத் திட்டங்கள், வீட்டுமனை, மின்சாரம் உள்ளிட்ட பல்வேறு திட்டங்களும் காங்கிரஸ் ஆட்சியில் செயல்படுத்தப்பட்டன. கா்நாடகத்தில் 2028 தோ்தலிலும் நாங்கள் மீண்டும் ஆட்சிக்கு வருவோம்.

காங்கிரஸ் அரசின் 5 முக்கிய வாக்குறுதி திட்டங்களின் மூலம் இதுவரை மக்களுக்கு ரூ.1.45 லட்சம் கோடி நேரடியாக வழங்கப்பட்டுள்ளது. உலகின் மிகப் பெரிய சமூகப் பாதுகாப்புத் திட்டங்களில் இவையும் அடங்கும்.

கிருஹ லட்சுமி திட்டத்தின் கீழ் 1.24 கோடி பெண்களுக்கு மாதந்தோறும் ரூ. 2,000 வழங்கப்படுகிறது. கிருஹ ஜோதி திட்டத்தின் மூலம் 1.67 கோடி குடும்பங்களுக்கு ரூ.30,522 கோடி மதிப்பிலான இலவச மின்சாரம் வழங்கப்பட்டுள்ளது. அன்ன பாக்யா திட்டத்தின் மூலம் வறுமைக்கோட்டுக்குக் கீழ் உள்ளோா் மற்றும் அந்த்யோதயா அன்ன யோஜனா குடும்ப அட்டைதாரா்கள் என சுமாா் 4 கோடி போ் பயனடைந்துள்ளனா். இதற்காக ரூ. 21,054 கோடி செலவிடப்பட்டுள்ளது.

சக்தி திட்டத்தின் மூலம் கா்நாடக அரசுப் போக்குவரத்துக் கழகங்களின் சாதாரண பேருந்துகளில் பெண்கள் சுமாா் 15.73 கோடி முறை இலவசமாகப் பயணம் செய்துள்ளனா். இலவசப் பேருந்துப் பயணத்தைப் பயன்படுத்தும் பெண்களுக்கு அட்டைகள் வழங்கி, அவா்களின் பயணத்தைப் பதிவு செய்யவும் அரசு முடிவு செய்துள்ளது. வாக்குறுதி திட்டங்களை நிறுத்த முடியாது.

யுவநிதி திட்டத்தின் மூலம் 3.72 லட்சம் பட்டதாரிகள் மற்றும் டிப்ளமோ முடித்தவா்கள் பயனடைந்துள்ளனா். அவா்களுக்கு ரூ.1,154 கோடி வழங்கப்பட்டுள்ளது. பிற்படுத்தப்பட்டோா், சிறுபான்மையினா் மற்றும் எஸ்சி, எஸ்டி பிரிவுகளைச் சோ்ந்த 50,000 இளைஞா்களுக்கு சுயதொழில் வாய்ப்புகளை ஏற்படுத்தும் திட்டம் செயல்படுத்தப்படும், சிறுபான்மை இளைஞா்களுக்காக உயா்தர திறன் மேம்பாட்டு மையங்கள் அமைக்கப்படும்.

தனியாா் நிறுவனங்களில் வேலை தேடும் மாணவா்களை வேலைவாய்ப்புகளுடன் இணைக்கும் ‘உத்யோக சேது’ தளமும் உருவாக்கப்படும். நேரடி பணப் பரிமாற்றத் திட்டங்கள் மூலம் ரூ.1,41,510 கோடி வழங்கப்பட்டுள்ளது. எஸ்சி, எஸ்டி நலனுக்காக ரூ. 42,018 கோடியும், பூஜ்ஜிய மற்றும் குறைந்த வட்டிக் கடன்களாக விவசாயிகளுக்கு ரூ. 25,652 கோடியும் வழங்கப்பட்டுள்ளது.

ரூ. 17,073 கோடி மதிப்பிலான பாசனத் திட்டங்கள் நிறைவேற்றப்பட்டுள்ளன. 70,475 கி.மீ. தொலைவுக்கு சாலைகள் அமைக்கப்பட்டுள்ளன. கல்யாண கா்நாடக பிராந்திய மேம்பாட்டு வாரியத்துக்கு ரூ. 5,000 கோடி ஒதுக்கப்பட்டுள்ளது.

கிருஹ ஆரோக்கியம் திட்டத்தின் கீழ் 88 லட்சம் பேருக்கு வீடு தேடிச் சென்று மருத்துவப் பரிசோதனை மேற்கொள்ளப்பட்டுள்ளது. ஹிருதய ஜோதி திட்டத்தின் மூலம் 21,659 பேருக்கு மாரடைப்புக்கான அறிகுறிகள் முன்கூட்டியே கண்டறியப்பட்டுள்ளன. விப்ரோ அறக்கட்டளையின் உதவியுடன் குழந்தைகளுக்கு வாரத்தில் 6 நாள்கள் முட்டை உள்ளிட்ட சத்துணவு வழங்கப்பட்டு வருகிறது.

அந்நிய நேரடி முதலீடுகளை ஈா்ப்பதில் கா்நாடகம் நாட்டிலேயே இரண்டாவது இடத்தில் உள்ளது, 6 லட்சத்துக்கும் அதிகமான வேலைவாய்ப்புகளை உருவாக்க இலக்கு நிா்ணயிக்கப்பட்டுள்ளது.

நான் முதல்வராகப் பொறுப்பேற்றதில் இருந்து 100 நாள்களில் சுமாா் ரூ. 43,000 கோடி முதலீடுகளுக்கு ஒப்புதல் அளிக்கப்பட்டுள்ளது. பல்லாரி, தொட்டபள்ளாபுரம் உள்ளிட்ட பகுதிகளில் தொழில்துறை குழுமங்கள் அமைக்கப்படுவதுடன், தொழிற்சாலைகளுக்கு அருகே தொழிலாளா்களுக்கான குடியிருப்புகளும் உருவாக்கப்படும்.

மாநிலம் முழுவதும் 1,000 கா்நாடக பொதுப் பள்ளிகள் அமைக்கப்படும். நிறுவனங்களின் சமூகப் பொறுப்பு நிதி ( இநத), உலக வங்கி நிதி ஆகியவை திரட்டப்படும். 6-ஆம் வகுப்பு முதல் செயற்கை நுண்ணறிவு கல்வி அறிமுகப்படுத்தப்படுவதுடன், செயற்கை நுண்ணறிவுக்கென தனிப் பல்கலைக்கழகமும் அமைக்கப்படும். ஒவ்வொரு வட்டத்திலும் தொலை மருத்துவ தீவிர சிகிச்சைப் பிரிவு ஏற்படுத்தப்படும். 1,000 தகன மேடைகள் ‘முக்திவனம்’ என்ற பெயரில் உருவாக்கப்படும்.

பெங்களூரில் சாலைப் பணிகளுக்காக ரூ. 2,000 கோடி ஒதுக்கப்பட்டுள்ளது. கூடுதல் காவல் பணியாளா்கள், காவல் நிலையங்களில் தனிப்படை உள்ளிட்டவற்றுடன் புதிய 5 அடுக்கு காவல் அமைப்பு உருவாக்க திட்டமிடப்பட்டுள்ளது.

‘பூஜ்ஜிய சகிப்புத்தன்மை, அச்சமற்ற கா்நாடகம்’ என்ற அணுகுமுறையுடன் காவல் துறை செயல்படும்.

காவிரி ஆற்றின் குறுக்கே மேக்கேதாட்டு சமநிலை நீா்த்தேக்கத் திட்டத்தைச் செயல்படுத்த அரசு நடவடிக்கை எடுத்து வருகிறது. இந்தத் திட்டத்துக்கான விரிவான திட்ட அறிக்கை மத்திய அரசிடம் சமா்ப்பிக்கப்பட்டுள்ளது. மத்திய அரசின் அனுமதி கிடைத்ததும் ஒரு மாதத்துக்குள் திட்டத்துக்கான பூமிபூஜையை நடத்த அரசு உறுதி கொண்டுள்ளது என்றாா்.