நஞ்சு கலந்த உணவு, பிரசாத விவகாரம்: மேலும் ஒருவர் சாவு

நஞ்சு கலந்த உணவு, பிரசாதம் சாப்பிட்ட விவகாரத்தில் இறந்தோரின் எண்ணிக்கை 15 ஆக உயர்ந்துள்ளது.
கர்நாடக மாநிலம், சாம்ராஜ்நகர் மாவட்டம், ஹனூர் வட்டம் சுலவாடி கிச்சிகுத்தி மாரியம்மன் கோயிலின் கோபுர அடிக்கல் நாட்டுவிழா டிச. 14-ஆம் தேதி நடைபெற்றது. அந்த விழாவில் மதிய உணவைச் சாப்பிட்ட 100-க்கும் அதிகமானோருக்கு வாந்தி, மயக்கம் ஏற்பட்டது. இதில் சம்பவதன்று 11 பேரும், பின்னர் மருத்துவமனையில் சிகிச்சைப் பெற்ற 2 பேரும் உயிரிழந்தனர்.  திங்கள்கிழமை மைசூரு தனியார் மருத்துவமனையில் சிகிச்சை பெற்று வந்த மெய்லி பாய் என்பவர் உயிரிழந்தார்.
இந்த நிலையில், செவ்வாய்க்கிழமை மைசூரு காவிரி மருத்துவமனையில் சிகிச்சைபெற்று வந்த மாதேஸ்வரா மலையைச் சேர்ந்த துண்டம்மா (50) என்பவர் உயிரிழந்தார். கோயிலில் உணவு, பிரசாதத்தை சமைத்த புட்டசாமி என்பவரும் சிகிச்சைக்காக மருத்துவமனையில் அனுமதிக்கப்பட்டார்.  அவரது உடல் நிலை தேறி வருகிறது.  நஞ்சு கலந்த உணவு, பிரசாதத்தை சாப்பிட்ட அவரது மகள் ஏற்கெனவே உயிரிழந்துள்ளது குறிப்பிடத்தக்கது.