தமிழக அரசு ஒத்துழைப்பு தராததால் மதுரை- அருப்புக்கோட்டை- தூத்துக்குடி ரயில் பாதை திட்டம் ரத்து

தமிழக அரசு ஒத்துழைப்பு அளிக்காததால், மதுரை - தூத்துக்குடி இடையே அருப்புக்கோட்டை வழியாக அமைக்கப்பட்டு வந்த புதிய அகல ரயில் பாதை திட்டம் கைவிடப்பட்டதாக மத்திய ரயில்வே துறை அமைச்சா் அஸ்வினி வைஷ்ணவ் தெரிவித்தாா்.

மதுரையிலிருந்து அருப்புக்கோட்டை மீளவிட்டான் வழியாக தூத்துக்குடிக்கு 143.5 கிமீ தொலைவுக்கு ரூ.1,875 கோடி மதிப்பில் புதிய அகல ரயில் பாதை அமைக்கும் பணிகள் கடந்த 2016-ஆம் ஆண்டு தொடங்கப்பட்டன.

இதில் முதல்கட்டமாக மீளாவிட்டான் முதல் மேல்மருதூா் வரை 18 கி.மீ.க்கு ரூ.260 கோடி செலவில் ரயில் பாதை அமைக்கும் பணிகள் முடிவடைந்து சோதனை ஓட்டங்களும் வெற்றிகரமாக நிறைவடைந்தன.

தொடா்ந்து, போதிய நிதி இல்லாத காரணத்தாலும், ரயில் பாதை அமைக்கத் தேவையான நிலத்தை கையகப்படுத்துவதில் சிக்கல் ஏற்பட்டதாலும், இத்திட்டம் தற்காலிகமாக நிறுத்திவைக்கப்பட்டது.

இந்தத் திட்டத்தை மீண்டும் தொடங்க வேண்டும் என தென்மாவட்ட மக்கள் மற்றும் தமிழக அரசு சாா்பில் மத்திய அரசுக்கு பல்வேறு கோரிக்கைகள் விடுக்கப்பட்டு வந்தது. இந்த நிலையில், இத்திட்டம் முழுமையாக கைவிடப்பட்டுவிட்டதாக ரயில்வே அமைச்சா் அஸ்வினி வைஷ்ணவ் தெரிவித்தாா்.

ஒத்துழைப்பு இல்லை: இது குறித்து சென்னையில் அவா் வெள்ளிக்கிழமை செய்தியாளா்களிடம் கூறியதாவது: தூத்துக்குடியிலிருந்து அருப்புக்கோட்டை வழியாக மதுரைக்கு அமைக்கப்பட்டு வந்த புதிய அலக ரயில் பாதை அமைக்கும் பணிகள் தற்காலிகமாக நிறுத்திவைக்கப்பட்டிருந்தன.

இத்திட்டத்தை வேண்டாம் எனக் கூறி தமிழக அரசிடமிருந்து எழுத்துபூா்வமான கடிதம் ரயில்வே துறைக்கு அனுப்பப்பட்டது. மாநில அரசின் ஒத்துழைப்பு இல்லாததால், இத்திட்டத்தை மத்திய அரசு முழுமையாக கைவிட்டுவிட்டது. தமிழகத்தில் ரயில்வே துறை சாா்பில் செயல்படுத்தப்படும் புதிய திட்டங்களுக்கு இனியாவது மாநில அரசு முழு ஒத்துழைப்பு வழங்க வேண்டும்.

50 அமிா்த பாரத் ரயில்கள்: ‘வந்தே பாரத்’ ரயில்களுக்கு மக்களிடையே நல்ல வரவேற்பு கிடைத்து வருகிறது. ஏழை எளிய மக்களும் அந்த ரயில்களில் பயணிக்கும் அனுபவத்தை பெற வேண்டும் என்ற நோக்கத்தில் வந்தே பாரத் ரயில்களில் இருக்கும் குளிா்சாதன வசதியை தவிர இதர வசதிகளுடன் குறைந்த கட்டணத்தில் ‘அம்ரித் பாரத்’ ரயில்கள் அறிமுகப்படுத்தப்பட்டுள்ளன.

அதிகளவில் இந்த ரயில்பெட்டிகளை தயாரிக்கும் பணிகள் நடைபெற்று வரும் நிலையில், பயணிகளின் வசதிக்காக தற்போது மேம்படுத்தப்பட்ட படுக்கை வசதி கொண்ட ‘அம்ரித் ரயில்’ பெட்டிகள் தயாரிக்கப்பட்டு வருகின்றன.

இந்த பெட்டிகளில் பணிகளுக்கு உடனுக்குடன் தகவல் தெரிவிக்கும் வசதி, கைப்பேசி வைக்கும் வசதி, நவீன கழிப்பறை, மாற்றுத்திறனாளிகளுக்காக சிறப்பு கழிப்பறை போன்ற சாதாரண ரயில் பெட்டிகளை விட 12 மேம்படுத்தப்பட்ட சிறப்பு அம்சங்கள் இடம்பெற்றுள்ளன. அடுத்த இரு ஆண்டுகளில் 50 அம்ரித் பாரத் ரயில்களை மக்கள் பயன்பாட்டுக்கு கொண்டு வரத் திட்டமிட்டுள்ளோம்.

மா்ம நபா்கள் சிலா் தண்டவாளங்களில் உள்ள போல்டுகளை கழற்றிச் செல்வதாக புகாா்கள் வந்த நிலையில், இனி வரும் காலங்களில் இதுபோன்ற சம்பவங்கள் நிகழாமல் இருக்க பாதுகாப்பு அம்சங்கள் மேம்படுத்தப்பட்டுள்ளன.

பாம்பன் பாலம்: ராமேசுவரம் பாம்பன் புதிய பாலம் அமைக்கும் பணிகள் முழுமையாக நிறைவு பெற்று சோதனை ஓட்டங்கள் நடைபெற்று வருகின்றன. விரைவில் அந்த பாலமும் திறந்து வைக்கப்படும் என்றாா் அவா்.

முன்னதாக, ஐசிஎஃப் தொழிற்சாலையில் தயாரிக்கப்பட்டு வரும் ‘அம்ரித பாரத் 2.0’ படுக்கை வசதி கொண்ட ரயில் பெட்டிகளை மத்திய அமைச்சா் அஸ்வினி வைஷ்ணவ் நேரில் ஆய்வு செய்தாா்.