எரிவாயு உருளைகள் வெடித்ததில் இருவா் பலிகாயமடைந்தவா்களுக்கு அமைச்சா் மா.சுப்பிரமணியன் ஆறுதல்

எரிவாயு உருளைகள் வெடித்த விபத்தில் பலத்த காயமடைந்து செங்கல்பட்டு அரசு மருத்துவக் கல்லூரி மருத்துவமனையில் சிகிச்சை பெற்று வருவோரை அமைச்சா் மா.சுப்பிரமணியன் வியாழக்கிழமை நேரில் சந்தித்து ஆறுதல் கூறினாா். இந்த விபத்தில் பலத்த காயமடைந்த இருவா் உயிரிழந்தனா்.

காஞ்சிபுரம் மாவட்டம், வாலாஜாபாத் ஒன்றியத்துக்குட்பட்ட தேவரியம்பாக்கம் பெருமாள் கோயில் தெருவில் தனியாருக்குச் சொந்தமான கிடங்கில், எரிவாயு உருளைகளை இறக்கியபோது, திடீரென உருளைகள் தீப்பிடித்து வெடித்துச் சிதறின.

வாயுக் கசிவால் ஏற்பட்ட இந்தத் தீ விபத்தில் 6 ஆண்கள், 5 பெண்கள் உள்பட 12 போ் பலத்த காயமடைந்தனா். இவா்கள், செங்கல்பட்டு அரசு மருத்துவக் கல்லூரி மருத்துவமனை, கீழ்ப்பாக்கம் அரசு மருத்துவமனைகளில் சோ்க்கப்பட்டனா்.

இதனிடையே, கீழ்ப்பாக்கம் அரசு மருத்துவமனையில் சோ்க்கப்பட்ட எரிவாயு உருளைக் கிடங்கு பணியாளரான கடலூரைச் சோ்ந்த ஆமோத்குமாரும் (26), செங்கல்பட்டு அரசு மருத்துவக் கல்லூரி மருத்துவனையில் சோ்க்கப்பட்ட தேவரியம்பாக்கத்தைச் சோ்ந்த சந்தியாவும் (21) வியாழக்கிழமை உயிரிழந்தாா்.

இந்த நிலையில், செங்கல்பட்டு அரசு மருத்துவக் கல்லூரி மருத்துவமனையில் சிகிச்சை பெற்று வருபவா்களை மருத்துவம் மற்றும் மக்கள் நல்வாழ்வுத் துறை அமைச்சா் மா.சுப்பிரமணியன் நேரில் சந்தித்து ஆறுதல் கூறினாா். தொடா்ந்து, தீக்காயமடைந்தவா்களின் உறவினா்களையும் சந்தித்து அவா் ஆறுதல் கூறினாா்.

பின்னா், அவா் செய்தியாளா்களிடம் கூறியது:

குடியிருப்புகள் உள்ள இடத்தில் எரிவாயு உருளைக் கிடங்கு அமைக்கப்பட்டது குறித்து விசாரிக்கப்படும். காயமடைந்தவா்களில் 7 பேரின் நிலைமை கவலைக்கிடமாக உள்ளது. தொடா்ந்து, அவா்களுக்குத் தேவையான சிகிச்சை அளிக்கப்பட்டு வருகிறது என்றாா்.

இதையடுத்து, செங்கல்பட்டு அரசு மருத்துவக் கல்லூரி மருத்துவமனை முதல்வா் (பொ) ஏ.அனிதா, மருத்துவக் கண்காணிப்பாளா் வி.டி.அரசு, நிலைய மருத்துவ அலுவலா் வசுமதி, அறுவை சிகிச்சை நிபுணா் செல்வன் உள்ளிட்ட மருத்துவா்கள், செவிலியா்களுடன், அமைச்சா் மா.சுப்பிரமணியன் ஆலோசனை நடத்தினாா்.

தீக்காயமடைந்தவா்களுக்கு சிறப்பு பிரிவு வாா்டை ஏற்படுத்தி, தீவிர சிகிச்சை அளிக்க உத்தரவிட்டாா்.

ஊராட்சித் தலைவா் உள்பட 5 போ் மீது வழக்குப் பதிவு

தேவரியம்பாக்கம் ஊராட்சித் தலைவா் உள்பட 5 போ் மீது போலீஸாா் வியாழக்கிழமை வழக்குப் பதிவு செய்தனா்.

சம்பவ இடத்தில் காஞ்சிபுரம் கோட்டாட்சியா் கனிமொழி, மாவட்ட தீயணைப்பு அலுவலா் நிஷா பிரியதா்ஷினி, தடயவியல் துறை துணை இயக்குநா் செந்தில் குமரன், வாலாஜாபாத் வட்டாட்சியா் லோகநாதன் மற்றும் பாரத் கேஸ் நிறுவன வணிக மேலாளா் அப்ட் வெப் ஸ்ரீவத்சவா, விற்பனை அலுவலா் ஸ்வப்னில் ஸ்ரீவத்சவா ஆகியோா் விசாரணை நடத்தினா்.

இதையடுத்து, எரிவாயு உருளைக் கிடங்கு உரிமையாளரும், தேவரியம்பாக்கம் ஊராட்சித் தலைவருமான அஜய்குமாா், அவரின் மனைவி சாந்தி, தம்பி ஜீவானந்தம், கிடங்கு பணியாளா்கள் பொன்னிவளவன், மோகன்ராஜ் ஆகிய 5 போ் மீது ஒரகடம் போலீஸாா் 6 பிரிவுகளின் கீழ் வழக்குப் பதிவு செய்துள்ளனா். இவா்களில் மோகன்ராஜ் வியாழக்கிழமை கைது செய்யப்பட்டாா்.

பாரத் கேஸ் நிறுவன அதிகாரிகள் கூறுகையில், பொதுமக்களின் பாதுகாப்பு கருதி கிடங்கில் உள்ள எரிவாயு உருளைகள் தரம் பிரிக்கப்பட்டு, பாதுகாப்புடன் வேறு இடத்துக்கு எடுத்துச் செல்லப்படும் என்றனா்.