மஞ்சள் காய்ச்சல் தடுப்பூசி மருந்து மீண்டும் எப்போது போடப்படும்?

"எல்லோ ஃபீவர்' என்று அழைக்கப்படும் "மஞ்சள் காய்ச்சல்' பாதிப்புக்கு உரிய தடுப்பூசி மருந்து தமிழகம் உள்பட இந்தியா முழுவதும் இல்லாத நிலை ஏற்பட்டுள்ளது.

இதனால் இந்தியாவிலிருந்து ஆப்பிரிக்கா, தென் அமெரிக்க நாடுகளுக்குப் பயணம் செய்யும் பயணிகள் அவதிக்குள்ளாகியுள்ளனர். மத்திய அரசின் மெத்தனப் போக்கு காரணமாகவே இந்த நிலை ஏற்பட்டுள்ளதாக மாநிலங்களின் சுகாதாரத் துறை உயர் அதிகாரிகள் தெரிவித்தனர். எனினும் தமிழகம் உள்பட நாடு முழுவதும் மஞ்சள் காய்ச்சல் தடுப்பூசி மருந்து இன்னும் ஒரு வாரத்தில் பயணிகளுக்கு கிடைக்கத் தொடங்கும் என்று அதிகாரிகள் தெரிவித்தனர்.

வைரஸ் காய்ச்சல்: "ஏடீஸ் எஜிப்டை' எனப்படும் கொசு காரணமாக "எல்லோ ஃபீவர்' எனப்படும் மஞ்சள் காய்ச்சல் (வைரஸ் காய்ச்சல்) ஏற்படுகிறது. இந்தக் காய்ச்சல் அங்கோலா, பெனின், எத்தியோப்பியா, சூடான், ஜாம்பியா உள்ளிட்ட ஆப்பிரிக்க நாடுகள் மற்றும் பிரேசில்-கொலம்பியா, பிரெஞ்ச் கயானா, பெரு, டிரினிடாட், வெனிசுலா, பனாமா உள்ளிட்ட தென் அமெரிக்க நாடுகளுக்குப் பயணம் செய்வோர் யாராக இருந்தாலும் மஞ்சள் காய்ச்சல் தடுப்பூசி மருந்து போட்டுக் கொண்டு சான்றிதழ் பெறுவது அவசியமாகும்.

மஞ்சள் காய்ச்சல் தடுப்பூசி மருந்து போட்டுக் கொண்ட பிறகு, தடுப்பூசி மருந்து செயல்பட ஆரம்பித்து 10 நாள்கள் கழித்துத்தான் பயணம் மேற்கொள்ள முடியும். மேலும் மஞ்சள் காய்ச்சல் தடுப்பூசி மருந்து சான்றிதழை அளித்தால்தான் விமானம் அல்லது கப்பலில் மேலே குறிப்பிட்ட நாடுகளுக்குப் பயணம் செய்ய அனுமதிப்பது வழக்கமாக உள்ளது.

ஏனெனில் மேலே குறிப்பிட்ட நாடுகளில் மஞ்சள் காய்ச்சல் பாதிப்பு உள்ளதால் அந்த நாட்டுக்கு பயணமாகச் செல்வோர், அந்த நாட்டிலிருந்து மஞ்சள் காய்ச்சலை சொந்த நாட்டுக்கு மீண்டும் கொண்டு வந்துவிடக் கூடாது என்பதற்காக இத்தகைய தடுப்பூசி மருந்து போட்டுக் கொள்வது கட்டாயம் என்ற நடைமுறை நீண்ட காலமாக உள்ளது.

10 ஆண்டுகளுக்கு செல்லும்: மஞ்சள் காய்ச்சலுக்கு உரிய தடுப்பூசி மருந்தை ஒருமுறை போட்டுக் கொண்டால், 10 ஆண்டுகளுக்கு செல்லுபடியாகும் வகையில் சான்றிதழ் அளிக்கப்படும். புதிதாக பயணம் செய்வோர் மற்றும் அவர்களது குழந்தைகளுக்கும் தடுப்பூசி மருந்து போட்டுக் கொண்டு சான்றிதழ் பெறுவது அவசியம்.

தடுப்பூசி மருந்து இல்லாமல் போனது ஏன்? மஞ்சள் காய்ச்சல் தடுப்பூசி மருந்தை தமிழகம் உள்பட அனைத்து மாநிலங்களுக்கும் வெளிநாட்டு நிறுவனத்திலிருந்து மத்திய அரசு இறக்குமதி செய்து அளித்து வந்தது. அந்த நிறுவனம் மஞ்சள் காய்ச்சல் தடுப்பூசி மருந்து விநியோகத்தை நிறுத்தி விட்டதால், கடந்த 3 மாதங்களாக தடுப்பூசி மருந்துக்கு கடும் தட்டுப்பாடு ஏற்பட்டு நாடு முழுவதும் பயணிகள் பயணம் மேற்கொள்ள முடியாமல் தவித்து வருகின்றனர்.

காத்திருக்கும் 1200 பயணிகள்: சென்னை கிண்டியில் உள்ள கிங் தடுப்பூசி மருந்து ஆராய்ச்சி மையம், துறைமுக மருத்துவமனை ஆகியவற்றில் மஞ்சள் காய்ச்சலுக்கான தடுப்பூசி மருந்து ரூ.500-க்கு போடப்படுவது வழக்கம். ஆனால் தடுப்பூசி மருந்து கையிருப்பில் இல்லாததால் கிங் தடுப்பூசி மருந்து ஆராய்ச்சி மையத்தில் மட்டும் 300-க்கும் மேற்பட்டோர் பதிவு செய்து காத்திருக்கின்றனர். மேலும் நாட்டின் பல்வேறு இடங்களிலிருந்து 900-க்கும் மேற்பட்ட பயணிகள், கிங் தடுப்பூசி மருந்து மையத்தை தொலைபேசியில் தொடர்பு கொண்டு தடுப்பூசி மருந்து குறித்து தொடர்ந்து விசாரித்து வருகின்றனர்.

சாதகமான முறையில் தடுப்பூசி மருந்து: இந்த நிலையில் அண்மையில் பிரான்ஸ் நாட்டைச் சேர்ந்த புதிய நிறுவனத்துடன் மஞ்சள் காய்ச்சல் தடுப்பூசி மருந்து விநியோக ஏற்பாட்டை மத்திய அரசு தொடங்கியுள்ளது. சிரிஞ்சில் (ஊசியில்) ஏற்கெனவே நிரப்பப்பட்ட நிலையில் தடுப்பூசி மருந்து ("சிங்கிள் டோஸ்') இனி விநியோகிக்கப்பட உள்ளது. கிங் தடுப்பூசி மருந்து ஆராய்ச்சி மையத்துக்கு 500 பயணிகள் பலன் பெறும் வகையில், வரும் மே 17-ஆம் தேதியன்று குறிப்பிட்ட அளவு தடுப்பூசி மருந்துகளை ("சிங்கிள் டோஸ்') பிரான்ஸ் நாட்டைச் சேர்ந்த நிறுவனம் அளிக்க உள்ளது. எனினும் மஞ்சள் காய்ச்சல் தடுப்பூசி மருந்துகள் வரும் தேதியை உறுதிப்படுத்திக் கொண்டு அது தொடர்பாக விரைவில் அறிவிப்பு வெளியிடப்படும் என்று கிங் தடுப்பூசி மருந்து ஆராய்ச்சி மைய உயர் அதிகாரிகள் தெரிவித்தனர். இதேபோன்று நாடு முழுவதும் மஞ்சள் காய்ச்சல் தடுப்பூசி மருந்து கிடைக்கும் வகையில் ஆவன செய்யப்பட்டு வருவதாக மத்திய சுகாதாரத் துறை உயர் அதிகாரிகள் தெரிவித்தனர்.