மீஞ்சூரில் ரயில்வே காவல் நிலையம்: ஏடிஜிபி சைலேந்திர பாபு உறுதி

செயின் பறிப்பு, கஞ்சா விற்பனை போன்ற குற்றச் செயல்கள் அதிகரித்து வருவதாக புகார் எழுந்துள்ள நிலையில், மீஞ்சூரில் ரயில்வே காவல் நிலையம் அமைக்க நடவடிக்கை எடுக்கப்படும் என்று ரயில்வே பாதுகாப்புப் படை ஏடிஜிபி சைலேந்திர பாபு கூறினார்.
சென்னை சென்ட்ரலில் இருந்து கும்மிடிப்பூண்டி வரை மின்சார ரயிலில், ரயில்வே பாதுகாப்புப் படை ஏடிஜிபி சைலேந்திர பாபு வியாழக்கிழமை காலை பயணம் செய்து பயணிகளிடம் குறைகளைக் கேட்டறிந்தார். பின்னர் மீஞ்சூர் ரயில் நிலையத்தில் இறங்கிய அவர், ரயில்வே அதிகாரிகளுடன் இணைந்து ஆய்வு நடத்தினார். மேலும் அவர்கள் ரயில் நிலையத்தில் இருந்த பயணிகளிடம் குறைகளை கேட்டறிந்தனர். அப்போது மீஞ்சூர் ரயில் நிலையத்தில் செயின் பறிப்பு, கஞ்சா விற்பனை உள்ளிட்ட குற்றச் செயல்கள் அதிகம் நடப்பதாகவும், இதைத் தடுக்க இங்கு ரயில்வே காவல் நிலையம் அமைக்க வேண்டுமெனவும் பொதுமக்கள் கோரிக்கை விடுத்தனர்.