குதிரையின் கழுத்து அறுப்பு: 3 பேர் கைது

சென்னை மெரீனாவில் இளைஞரிடம் ஏற்பட்ட முன் விரோதத்தில் குதிரையின் கழுத்தை அறுத்தது தொடர்பாக 3 பேர் கைது செய்யப்பட்டுள்ளனர்.
இதுகுறித்து போலீஸ் தரப்பில் கூறப்படுவதாவது: திருவல்லிக்கேணி நடுக்குப்பம் 6-ஆவது தெருவைச் சேர்ந்தவர் செ.ராஜேஷ் (35). குதிரை வைத்திருக்கும் இவர், இந்தக் குதிரையை மெரீனா கடற்கரையில் பொதுமக்கள் சவாரிக்குப் பயன்படுத்தி வருகிறார். இந்நிலையில் ராஜேஷின் குதிரை, வீட்டின் அருகே உள்ள லாயத்தில் கடந்த 24-ஆம் தேதி கட்டப்பட்டிருந்தது. அப்போது அங்கு வந்த சிலர், குதிரையின் கழுத்தை அறுத்துவிட்டு தப்பியோடினர்.
குதிரையின் அலறல் சத்தம் கேட்டு அங்கு வந்த ராஜேஷ் குடும்பத்தினர், குதிரையை உடனடியாக கால்நடை மருத்துவமனைக்கு கொண்டுச் சென்று சிகிச்சை அளித்தனர். கழுத்து பகுதியில் பலத்த காயமடைந்த குதிரைக்கு சுமார் 50 தையல்கள் போடப்பட்டன. இதுதொடர்பாக ராஜேஷ், மெரீனா காவல் நிலையத்தில் புகார் செய்தார்.
அதனடிப்படையில் போலீஸார் நடத்திய விசாரணையில், அதே பகுதியைச் சேர்ந்த ர.விக்னேஷ் (18), பா.விஷால் (19), ர.கார்த்திக் (22), கோகுல் ஆகியோர் இச்செயலை செய்திருப்பதும், ராஜேஷூக்கும், கோகுலுக்கும் இடையே முன் விரோதம் இருந்து வந்ததும் தெரியவந்தது. இதையடுத்து போலீஸார் விக்னேஷ், விஷால், கார்த்திக் ஆகிய 3 பேரை வியாழக்கிழமை கைது செய்தனர். தலைமறைவாக உள்ள கோகுல் தேடப்பட்டு வருகிறார்.