எழிலகத்தில் தீ விபத்து

சென்னை சேப்பாக்கம் எழிலகத்தில் திங்கள்கிழமை தீ விபத்து ஏற்பட்டது.
சென்னை சேப்பாக்கம் எழிலகத்தில் உள்ள நீர்வளத்துறை கட்டடத்தில் திங்கள்கிழமை காலை திடீரென புகை எழும்பியது. சிறிது நேரத்தில் அங்கிருந்த பொருள்கள் தீப்பிடித்து எரியத் தொடங்கின. மேலும் தீ வேகமாக பரவத் தொடங்கியது.இதைப் பார்த்த அங்கிருந்த ஊழியர்கள், தீயை அணைக்க முயன்றனர். ஆனால் அவர்களால் தீயை அணைக்க முடியவில்லை.
தகவலறிந்த தீயணைப்பு படை வீரர்கள், சம்பவ இடத்துக்கு விரைந்து தீயை அணைக்கும் பணியில் ஈடுபட்டனர். சிறிது நேர போராட்டத்துக்கு பின்னர், தீ முழுமையாக அணைக்கப்பட்டது. ஏ.சி. இயந்திரத்தில் ஏற்பட்ட மின்கசிவே இந்த தீ விபத்துக்கு காரணம் என தீயணைப்பு துறையினர் தெரிவித்தனர்.
இந்த சம்பவம் குறித்து அண்ணா சதுக்கம் போலீஸார் வழக்குப் பதிவு செய்து, விசாரணை நடத்தி வருகின்றனர். இந்த விபத்தில் அங்கிருந்த ஏ.சி., இன்வெர்ட்டர் உள்ளிட்ட எலக்ட்ரானிக்ஸ் பொருள்கள் எரிந்து நாசமானதாகக் கூறப்படுகிறது.