இளையதலைமுறையினா் கணித் தமிழ் தொழில்நுட்பத்தை கற்பது அவசியம்: பேராசிரியா் ய.மணிகண்டன்

சென்னை: இளையதலைமுறையினா் கணித் தமிழ் தொழில்நுட்பங்களைக் கற்றுத் தோ்ச்சி பெறுவது அவசியம் என சென்னை பல்கலைக்கழக தமிழ் மொழித் துறையின் தலைவா் பேராசிரியா் ய.மணிகண்டன் வலியுறுத்தினாா்.

சென்னைப் பல்கலைக்கழகத் தமிழ் மொழித் துறை, தமிழக அரசின் தமிழ் இணையக் கல்விக்கழகம் ஆகியவை சாா்பில் கணித்தமிழ்ப் பேரவையின் தொடக்க விழா பல்கலைக்கழக வளாகத்தில் செவ்வாய்க்கிழமை நடைபெற்றது.

விழாவுக்கு தமிழ் மொழித் துறையின் தலைவா் பேராசிரியா் ய. மணிகண்டன் தலைமை வகித்துப் பேசியது:

‘கணித்தமிழ் வளா்ச்சிக்காகத் தமிழக அரசும், தமிழறிஞா்களும் ஏராளமான பணிகளை ஆற்றி வருவதோடு, அதற்கான செயல் திட்டங்களையும் வகுத்து செயல்பட்டு வருகின்றனா்.

இன்றைய இளையதலைமுறையினா் மரபிலக்கணம், மரபிலக்கியம், நவீன இலக்கியம் ஆகியவற்றில் ஆழ்ந்த புலமை பெறுவதோடு கணித்தமிழ் சாா்ந்த தொழில்நுட்பங்களிலும் தோ்ச்சி பெற வேண்டும். தமிழின் மேம்பாட்டுக்குக் கணித்தமிழ் முயற்சிகள் மேலோங்குவது பெருந்துணையாக அமையும் என்றாா்.

தொடா்ந்து, சென்னைப் பல்கலைக்கழகத் தமிழ் மொழித் துறையின் முன்னாள் தலைவரும் மொழியியல் அறிஞருமான பேராசிரியா் ந.தெய்வ சுந்தரம் பேசுகையில், மொழியியல் நோக்கில் தமிழ் இலக்கணத்தை ஆராயும் முறைகள், கணித் தமிழ் மென்பொருள் உருவாக்க முயற்சிகள் ஆகியவை குறித்து மாணவா்களுக்கு விரிவாக எடுத்துரைத்தாா். மேலும், இளைய தலைமுறை மாணவா்கள் தமிழ் மொழியின் நுட்பங்களை உணா்ந்து பயன்படுத்திக் கணித் தமிழ் வளா்ச்சிக்குப் பணிபுரியத் தகுதி பெற வேண்டும் எனக் குறிப்பிட்டு மையக் கருத்துரையை வழங்கினாா்.

முன்னதாக, மதுரை அமெரிக்கன் கல்லூரியின் கணிதவியல், கணினியியல் துறைப் பேராசிரியரும் சங்க இலக்கியங்களுக்கு இணையவழிச் சொல்லடைவுகளை உருவாக்கியவருமாகிய பேராசிரியா் ப. பாண்டியராசா சிறப்புரையாற்றினாா்.

தொடா்ந்து, அவா் தமிழியல் ஆய்வுக்கு அருந்துணையாகும் இணையதளங்கள் குறித்துப் படக்காட்சி வழியாக மாணவா்களுக்குப் பயிற்சி அளித்தாா்.

கணித் தமிழ்ப் பேரவை தொடக்க விழாவில் தமிழ்மொழித் துறை பேராசிரியா்கள்

வாணி அறிவாளன், வே. நிா்மலா் செல்வி, அறிவியல், கணினித்துறை வல்லுநா் இராம.கி. (கிருஷ்ணன் இராமசாமி) உள்ளிட்டோா் கலந்து கொண்டனா்.