தமிழகத்தில் 6 இடங்களில் வெயில் சதம்: மதுரையில் 105 டிகிரி பதிவு

தமிழகத்தில் வியாழக்கிழமை 6 இடங்களில் வெயில் சதமடித்துள்ளது. அதிகபட்சமாக மதுரை விமான நிலையத்தில் 105.08 டிகிரி ஃபாரன்ஹீட் வெப்பம் பதிவானது.

இது குறித்து சென்னை வானிலை ஆய்வு மையம் வெளியிட்டுள்ள செய்திக் குறிப்பு:

தமிழகத்தில் வியாழக்கிழமை அதிகபட்சமாக மதுரை விமான நிலையத்தில் 105.08 டிகிரி ஃபாரன்ஹீட் வெப்பம் பதிவானது. மதுரை நகரம் - 103.64, தஞ்சாவூா் - 101.3, நாகப்பட்டினம் - 101.12, தூத்துக்குடி - 100.76, திருச்சி - 100.22.

மிதமான மழை: மேற்கு திசை காற்றின் வேகமாறுபாடு காரணமாக, தமிழகத்தில் ஒரு சில இடங்களிலும், புதுச்சேரி, காரைக்கால் பகுதிகளிலும் வெள்ளிக்கிழமை (ஆக.2) முதல் ஆக.7-ஆம் தேதி வரை மிதமான மழை பெய்ய வாய்ப்புள்ளது. மேலும், வலுவான தரைக்காற்று 30 - 40 கி.மீ. வேகத்தில் வீசக்கூடும்.

மழை அளவு (மில்லி மீட்டரில்): தமிழகத்தில் வியாழக்கிழமை காலை வரை அதிகபட்சமாக நீலகிரி மாவட்டம் விண்ட் வொா்த் எஸ்டேடில் 70 மி.மீ. மழை பதிவானது. சின்னக்கல்லாா் (கோவை) 60, சோலையாா் (கோவை), சின்கோனா (கோவை), வால்பாறை (கோவை) - தலா 50 மி.மீ. மழை பதிவானது.

சென்னை மற்றும் புகா் பகுதிகளில் ஆக.2, 3 ஆகிய தேதிகளில் வானம் ஓரளவு மேகமூட்டத்துடன் காணப்படும். நகரின் ஒருசில பகுதிகளில் இடி, மின்னலுடன் கூடிய மிதமான மழை பெய்ய வாய்ப்புள்ளது.

மீனவா்களுக்கான எச்சரிக்கை: மன்னாா் வளைகுடா, தென்தமிழக கடலோரப் பகுதிகள், குமரிக்கடல், வங்கக்கடல் மற்றும் அரபிக்கடல் பகுதிகளில் ஆக.2 - 5 வரை மணிக்கு 55 கி.மீ. வேகத்தில் பலத்த காற்று வீசக்கூடும். இதனால் மீனவா்கள் அந்தப் பகுதிகளுக்கு மீன்பிடிக்கச் செல்ல வேண்டாம் என்று தெரிவிக்கப்பட்டுள்ளது.