தமிழகத்தில் சென்னை உள்பட 9 இடங்களில் வெயில் சதம்

தமிழகத்தில் சென்னை உள்பட 9 இடங்களில் புதன்கிழமை வெப்பநிலை 100 டிகிரி ஃபாரன்ஹீட்டுக்கும் அதிகமாக பதிவானது.

இது குறித்து சென்னை வானிலை ஆய்வு மையம் புதன்கிழமை வெளியிட்ட செய்திக் குறிப்பு:

தமிழகத்தில் புதன்கிழமை அதிகபட்சமாக மதுரை விமான நிலையத்தில் 104.36 டிகிரி ஃபாரன்ஹீட் பதிவானது. மதுரை நகரம் - 102.56, தூத்துக்குடி - 102.02, பாளையங்கோட்டை - 101.84, சென்னை நுங்கம்பாக்கம் - 100.94, பரமத்திவேலூா் - 100.4, சென்னை மீனம்பாக்கம் - 100.22, ஈரோடு, வேலூா் - தலா 100.04 டிகிரி என மொத்தம் 9 இடங்களில் வெயில் சதமடித்துள்ளது.

மழைக்கு வாய்ப்பு: மேற்கு திசை காற்றின் வேகமாறுபாடு காரணமாக, தமிழகத்தில் ஒருசில இடங்களிலும், புதுச்சேரி மற்றும் காரைக்கால் பகுதிகளிலும் வியாழக்கிழமை (ஜூலை 4) முதல் ஜூலை 9-ஆம் தேதி வரை இடி, மின்னலுடன் கூடிய மிதமான மழை பெய்ய வாய்ப்புள்ளது.

சென்னையில்... சென்னை, புகா் பகுதிகளில் ஜூலை 4, 5 ஆகிய தேதிகளில் நகரின் ஒருசில பகுதிகளில் இடி, மின்னலுடன் கூடிய மிதமான மழை பெய்ய வாய்ப்புள்ளது. மேலும் அதிகபட்ச வெப்பநிலை 99 டிகிரி ஃபாரன்ஹீட் வரை இருக்கும்.

மீனவா்களுக்கான எச்சரிக்கை: ஜூலை 4 முதல் 7-ஆம் தேதி வரை மன்னாா் வளைகுடா மற்றும் அதையொட்டிய தென்தமிழக கடலோரப் பகுதிகளில் மணிக்கு 55 கி.மீ. வேகத்தில் பலத்த காற்று வீசக்கூடும். இதனால் மீனவா்கள் அந்தப் பகுதிகளுக்கு மீன்பிடிக்கச் செல்ல வேண்டாம் எனத் தெரிவிக்கப்பட்டுள்ளது.