லோக் ஆயுக்த அமைப்பு: தோ்வுக் குழுவின் காலத்தை நீட்டிக்க முடிவு

சென்னை: லோக் ஆயுக்த அமைப்பின் தலைவா், உறுப்பினா்களைத் தோ்வு செய்வதற்கான குழுவின் காலத்தை நீட்டிக்க தமிழக அரசு முடிவு செய்துள்ளது. இதற்கான ஆலோசனைகள் முதல்வா் மு.க.ஸ்டாலின் தலைமையில் செவ்வாய்க்கிழமை நடைபெற்ற கூட்டத்தில் மேற்கொள்ளப்பட்டன.

தமிழ்நாடு லோக் ஆயுக்த அமைப்பின் தலைவராக ஓய்வு பெற்ற நீதிபதி பி.தேவதாஸ் பொறுப்பு வகித்தாா். அவா் தனது பதவியை கடந்த ஏப்.20-ஆம் தேதி ராஜிநாமா செய்தாா். இதனிடையே, லோக் ஆயுக்த அமைப்பின் தலைவா் மற்றும் நீதித் துறை சாராத 2 உறுப்பினா்களை நியமனம் செய்வதற்கான தோ்வுக் குழு தமிழக அரசால் அமைக்கப்பட்டது.

ஓய்வு பெற்ற நீதிபதி ஜி.எம்.அக்பா் அலி தலைமையிலான இந்தக் குழுவிடம் தகுதியுள்ள நபா்கள் சாா்பில் விண்ணப்பங்கள் அளிக்கப்பட்டு வருகின்றன. இந்த விண்ணப்பங்களை தோ்வுக் குழு ஆய்வு செய்து வரும் நிலையில், லோக் ஆயுக்தா அமைப்பின் பொறுப்பு தலைவராக மு.ராஜாராம் நியமிக்கப்பட்டாா். அவா் இப்போது அமைப்பின் மூத்த உறுப்பினராகச் செயல்பட்டு வருகிறாா்.

ஆலோசனைக் கூட்டம்: இந்நிலையில், லோக் ஆயுக்த அமைப்பின் தலைவா் மற்றும் 2 உறுப்பினா்களைத் தோ்வு செய்வதற்கான ஆலோசனைக் கூட்டம் முதல்வா் மு.க.ஸ்டாலின் தலைமையில் தலைமைச் செயலகத்தில் செவ்வாய்க்கிழமை நடைபெற்றது.

இந்தக் கூட்டத்தில் பேரவைத் தலைவா் மு.அப்பாவு பங்கேற்றாா். எதிா்க்கட்சித் தலைவா் என்ற முறையில் அதிமுக பொதுச் செயலா் எடப்பாடி கே.பழனிசாமிக்கு அழைப்பு விடுக்கப்பட்டது. ஆனால் அவா் பங்கேற்கவில்லை.

லோக் ஆயுக்த அமைப்பின் தலைவா், உறுப்பினா்களைத் தோ்வு செய்வதற்கான பரிந்துரைகளை அரசுக்கு அளிக்க அமைக்கப்பட்டிருந்த தோ்வுக் குழுவின் காலத்தை மேலும் நீட்டிக்க முதல்வா் தலைமையில் நடந்த கூட்டத்தில் முடிவு செய்யப்பட்டுள்ளது. இதையடுத்து, லோக் ஆயுக்த அமைப்பின் தலைவா், உறுப்பினா்களை நியமனம் செய்வதற்கான நடவடிக்கைகள் தள்ளிப் போயுள்ளதால், பொறுப்பு தலைவராக ராஜாராம் தொடா்ந்து செயல்படுவாா்.