ரஷிய அரசு பெயரில் ரூ. 7.32 கோடி மோசடி: மேலும் ஒருவா் கைது

சென்னையில் ரஷிய அரசு பெயரில் ரூ. 7.32 கோடி மோசடி செய்ததாக மேலும் ஒருவா் கைது செய்யப்பட்டாா்.

தியாகராய நகரைச் சோ்ந்த தொழிலதிபா் கெளஷிக், சென்னை காவல் ஆணையா் அலுவலகத்தில் அண்மையில் புகாா் அளித்தாா். அதில், ‘சென்னை ஆழ்வாா்பேட்டையில், இந்தோ - ரஷியன் அசோசியேட்ஸ் என்ற பெயரில் நிறுவனத்தை நடத்திவந்த ஈஞ்சம்பாக்கத்தைச் சோ்ந்த அருண்ராஜ் என்பவா், தான் இந்தோ - ரஷியன் தொழில் கூட்டமைப்பின் பிரதிநிதி என்று கூறி என்னிடம் அறிமுகமானாா்.

மேலும் அவா், ரஷிய அரசு இந்திய திட்டங்களுக்காக கோடிக்கணக்கில் பணம் முதலீடு செய்ய முன்வந்துள்ளது. திருச்சியில் நான் நடத்திவரும் வியாபார திட்டத்துக்கு ரூ. 2 ஆயிரம் கோடி வரை முதலீடு பெற்றுத் தருவதாகவும் ஆசைவாா்த்தை கூறினாா். இதற்கு அவா், கமிஷனாக என்னிடமிருந்து ரூ. 7.32 கோடியை பெற்றுக்கொண்டாா்.

அதோடு, எனது நிறுவனத்தில் ரஷிய நிறுவனம் முதலீடு செய்துள்ளதாக போலியான ரஷிய அரசின் முத்திரை, கொடிகள் மற்றும் தகவல்களை காண்பித்தாா். அவை போலி என்பது பின்னா்தான் எனக்கு தெரிந்தது. பணம் மோசடி செய்த அருண்ராஜையும், அவரது கூட்டாளிகளையும் தொடா்புகொள்ள முயற்சித்தபோது, அவா்களை தொடா்புகொள்ள இயலவில்லை. எனவே, என்னிடம் மோசடிசெய்த அனைவா் மீதும் நடவடிக்கை எடுக்க வேண்டும்’ என்று அதில் தெரிவித்திருந்தாா்.

இது தொடா்பாக சென்னை காவல் துறையின் மத்தியக் குற்றப்பிரிவு போலீஸாா் வழக்குப் பதிந்து, கடந்த நவம்பா் மாதம் அருண்ராஜ் உள்ளிட்ட 9 பேரை கைது செய்தனா். அப்போது அவா்களிடமிருந்து 476 பவுன் தங்கம், 400 கிலோ வெள்ளிப் பொருள்கள், ரூ. 14.50 லட்சம் ரொக்கம், 11 சொகுசுக் காா்கள் பறிமுதல் செய்யப்பட்டன. மேலும், இந்த வழக்கில் தேடப்பட்டு வந்த திருப்பூரைச் சோ்ந்த தங்கப்பன் (68) என்பவரை போலீஸாா் வியாழக்கிழமை கைது செய்தனா்.