தாம்பரம் மாநகர காவல் துறையால் பறிமுதல் செய்யப்பட்ட 1,060 கிலோ கஞ்சா அழிப்பு

தாம்பரம் மாநகர காவல்துறையின் சாா்பில் பல்வேறு வழக்குகளில் பறிமுதல் செய்யப்பட்ட 1,060 கிலோ கஞ்சா தீயில் எரித்து அழிக்கப்பட்டது.

தாம்பரம் மாநகர காவல்துறையின் சாா்பில் போதைப் பொருள் கடத்தல்,விற்பனையை தடுக்க பல்வேறு நடவடிக்கைகள் எடுக்கப்படுகின்றன. இந்நிலையில் பல்வேறு வழக்குகளில் பறிமுதல் செய்யப்பட்ட 1,060 கிலோ கஞ்சா,105 கிலோ கஞ்சா சாக்லேட்டுகள்,51 கிராம் மெத்தம்பெட்டமைன்,1,988 போதை மாத்திரைகள் ஆகியவற்றை தீயில் எரித்து அழிப்பதற்கு தாம்பரம் மாநகர காவல்துறை முடிவு செய்தது.

இதற்காக தாம்பரம் மாநகர காவல்துறை அதிகாரிகள், நீதிமன்றத்தில் அனுமதி பெற்றனா். இதையடுத்து 1,060 கிலோ கஞ்சா,105 கிலோ கஞ்சா சாக்லேட்டுகள்,51 கிராம் மெத்தம்பெட்டமைன்,1,988 போதை மாத்திரைகள் செங்கல்பட்டு அருகே தென்மேல்பாக்கம் கிராமத்தில் உள்ள தனியாா் ஆபத்தான ரசாயன பொருள்கள் அழிக்கும் களத்தில் சுமாா் ஆயிரம் டிகிரி செல்ஷியஸ் வெப்பநிலையில் செவ்வாய்க்கிழமை எரிக்கப்பட்டன.

இதேபோல பல்வேறு வழக்குகளில் பறிமுதல் செய்யப்பட்ட 10,597 கிலோ போதைப் பாக்குகள் பெருங்குடி குப்பை கிடங்கில் அழிக்கப்பட்டன.

தாம்பரம் காவல்துறையின் சாா்பில் இந்தாண்டு இது வரையில் 1,970 கிலோ கஞ்சா,10,597 போதை பாக்கு ஆகியவை அழிக்கப்பட்டிருப்பது குறிப்பிடதக்கது.