வருமான வரி மோசடி வழக்கு: தனியாா் நிறுவன இயக்குநா்கள் விடுதலை!

வருமான வரி மோசடி வழக்கில் இக்கி நிறுவன இயக்குநா்களுக்கு விதிக்கப்பட்ட சிறைத் தண்டனையை ரத்து செய்த சென்னை உயா்நீதிமன்றம், இயக்குநா்கள் இருவரையும் விடுதலை செய்து உத்தரவிட்டது.

‘இக்கி ரிசாா்ட்ஸ் இண்டா்நேஷனல் லிமிடெட்’ என்ற நிறுவனம், ரூ.71 லட்சம் வருமான வரி நிலுவை வைத்துள்ளதாகக் கூறி, அந்த நிறுவனத்தின் சொத்துகளை வருமான வரித்துறை கடந்த 2000-ஆம் ஆண்டில் முடக்கியது. இந்த சொத்து முடக்கத்தை நீக்குவதற்காக, வேறொரு சொத்தைக் கணக்கு காட்டி, மோசடியில் ஈடுபட்டதாக அப்போதைய வருமான வரித்துறை ஆணையா் திரிபாதி, இக்கி நிறுவன இயக்குநா்களான சி.முத்துசாமி மற்றும் ஜே.ஆா்.ராபின்சன் ஆகியோா் மீது சிபிஐ வழக்குப்பதிவு செய்தது.

இந்த வழக்கை விசாரித்த சிபிஐ சிறப்பு நீதிமன்றம், இக்கி நிறுவன இயக்குநா்கள் இருவருக்கும் தலா மூன்றாண்டுகள் சிறைத் தண்டனை விதித்தும், வழக்கில் குற்றம்சாட்டப்பட்டிருந்த வருமான வரித்துறை ஆணையா் திரிபாதியை விடுதலை செய்தும் கடந்த 2017-ஆம் ஆண்டு தீா்ப்பளித்தது. இந்த தீா்ப்பை எதிா்த்து இக்கி நிறுவன இயக்குநா்களான முத்துசாமி மற்றும் ராபின்சன் தரப்பில் சென்னை உயா்நீதிமன்றத்தில் மேல்முறையீட்டு மனு தாக்கல் செய்யப்பட்டது.

இந்த வழக்கு நீதிபதி ஜி.கே.இளந்திரையன் முன் விசாரணைக்கு வந்தது. அப்போது மனுதாரா்கள் தரப்பில் ஆஜரான மூத்த வழக்குரைஞா் அசன் முகமது ஜின்னா, மனுதாரா்கள் மீதான குற்றச்சாட்டுக்கான ஆதாரங்களை சமா்ப்பிக்கவும், மோசடி குற்றச்சாட்டை நிரூபிக்கவும் சிபிஐ தவறிவிட்டது. மேலும் இந்த வழக்கில் இருந்து விடுதலை செய்யப்பட்ட வருமான வரித்துறை ஆணையா் திரிபாதி விடுதலையை எதிா்த்து சிபிஐ மேல்முறையீடும் செய்யவில்லை. எனவே, மனுதாரா்களையும் விடுதலை செய்ய வேண்டும் என வாதிட்டாா்.

இதையடுத்து வழக்கை விசாரித்த நீதிபதி, இந்த வழக்கில் மனுதாரா்கள் மீது பதிவுசெய்யப்பட்டுள்ள கூட்டுச்சதி மற்றும் மோசடி குற்றச்சாட்டுகள் சந்தேகத்துக்கு இடமின்றி நிரூபிக்கப்படவில்லை எனக்கூறி, இக்கி நிறுவன இயக்குநா்கள் இருவரையும் விடுதலை செய்து உத்தரவிட்டாா். மேலும், குற்றம்சாட்டப்பட்ட நபா்களுக்கு இடையேயான தொடா்பை மட்டுமே அடிப்படையாகக் கொண்டு கூட்டுச்சதி குற்றத்தை நிரூபிக்க முடியாது என நீதிபதி தெரிவித்துள்ளாா்.