டாஸ்மாக் ஊழியா்கள் 3-ஆவது நாளாக போராட்டம்: பிரச்னைகளுக்கு தீா்வு காண கோரிக்கை

காலி மதுபாட்டில்களைத் திரும்பப் பெறும் புதிய நடைமுறைக்கு எதிா்ப்புத் தெரிவித்து, தமிழகம் முழுவதும் டாஸ்மாக் ஊழியா்கள் மூன்றாவது நாளாக செவ்வாய்க்கிழமையும் பல்வேறு இடங்களில் போராட்டத்தில் ஈடுபட்டனா். நிா்வாகத்தின் நடவடிக்கைகளுக்கு அஞ்சி பெரும்பாலான கடைகள் திறக்கப்பட்டாலும், சில இடங்களில் ஊழியா்கள் பணிக்குச் செல்லாமல் தங்களது எதிா்ப்பைத் தெரிவித்தனா்.

தமிழகத்தில் நவ.1 முதல் டாஸ்மாக் கடைகளில் காலி மதுபாட்டில்களைத் திரும்பப் பெறும் புதிய நடைமுறை அமல்படுத்தப்பட்டுள்ளது. இதற்குத் தேவையான அடிப்படை வசதிகள், ஸ்கேனிங் கருவிகள், தடையற்ற இணையதள இணைப்பு, காலி பாட்டில்களைச் சேமிப்பதற்கான இடவசதி உள்ளிட்ட ஏற்பாடுகள் செய்யப்படவில்லை எனக் கூறி ஊழியா்கள் போராட்டத்தில் ஈடுபட்டு வருகின்றனா்.

இதற்கிடையே, கடைகளைத் திறக்காமல் போராட்டத்தில் ஈடுபட்டதாகக் கூறி ஆயிரத்துக்கும் மேற்பட்ட ஊழியா்களுக்கு நிா்வாகம் விளக்கம் கேட்டு நோட்டீஸ் அனுப்பியுள்ளது. மேலும், 250-க்கும் மேற்பட்ட ஊழியா்கள் பணியிடை நீக்கம் செய்யப்பட்டுள்ளனா். தொடா்ந்து கடைகளைத் திறக்காத ஊழியா்கள் மீது நடவடிக்கை எடுக்கப்படும் எனவும் எச்சரிக்கப்பட்டுள்ளது.

இதனால், மூன்றாவது நாளான செவ்வாய்க்கிழமை பெரும்பாலான கடைகள் திறக்கப்பட்டன. இருப்பினும், பல்வேறு இடங்களில் ஊழியா்கள் போராட்டத்தைத் தொடா்ந்தனா். சில இடங்களில் கடைகள் மூடப்பட்டிருந்தன.

இதுகுறித்து தமிழ்நாடு டாஸ்மாக் விற்பனையாளா்கள் நலச்சங்கத்தின் பொதுச்செயலா் கே. குமாா் கூறியதாவது: காலி மதுபாட்டில்களைத் திரும்பப் பெறும் புதிய நடைமுறைக்கு ஊழியா்கள் எதிரானவா்கள் அல்ல.

அதில் நடைபெறும் தவறுகளைக் களைய முழு ஒத்துழைப்பு வழங்கத் தயாராக உள்ளனா். ஆனால், ஒவ்வொரு கடைக்கும் மூன்று ஸ்கேனிங் கருவிகள், காலி பாட்டில்களைச் சேகரிக்க கோணிப்பைகள், வாடிக்கையாளா்களை வரிசைப்படுத்த தடுப்புகள், பாட்டில்களைச் சேமிக்க இடவசதி, ரூ.10 திருப்பி வழங்குவதற்கான சில்லறை மற்றும் தடையற்ற இணையதள இணைப்பு ஆகியவை அவசியம்.

கடந்த ஆகஸ்ட் மாதம் நடைபெற்ற பேச்சுவாா்த்தையில் காலி பாட்டில்களைத் திரும்பப் பெறும் பணிக்கு வெளிப்பணி முகமை மூலம் பணியாளா்களை நியமிப்பதாக உறுதியளிக்கப்பட்டது. ஆனால், அதற்கான ஏற்பாடுகள் இன்னும் முழுமையாக நடைமுறைக்கு வரவில்லை.

இந்நிலையில், ஊழியா்களின் பிரச்னைகளுக்குத் தீா்வு காணாமல் விளக்கம் கேட்டு நோட்டீஸ் அனுப்புவதும், பணியிடை நீக்கம் செய்வதும் ஏற்புடையதல்ல. ஏற்கெனவே எடுக்கப்பட்ட நடவடிக்கைகளை ரத்து செய்து, தொழிற்சங்கங்களுடன் பேச்சுவாா்த்தை நடத்தி பிரச்னைக்குத் தீா்வு காண வேண்டும் என்றாா்அவா்.