சவ்வுடுமண் ஏற்றிச் செல்லும் லாரிகளால் வாகன ஓட்டிகள் அவதி

முறையான பாதுகாப்பு இல்லாமல் அளவுக்கு அதிகமாக சவ்வுடுமண் ஏற்றிச் செல்லும் லாரிகளால் இருசக்கர வாகன ஓட்டிகளும், பொதுமக்களும் சிரமத்திற்குள்ளாகி வருகின்றனர்.
பொதுப்பணித்துறை கட்டுப்பாட்டில் உள்ள ஸ்ரீபெரும்புதூர் ஏரியில் கடந்த சில தினங்களாக தனியார் மணல் குவாரி செயல்பட்டு வருகிறது. இந்த மண் குவாரியில் இருந்து தினமும் நூற்றுக்கணக்கான லாரிகளில் மண் எடுத்துச் செல்லப்படுகிறது. இந்நிலையில், இந்த மணல் குவாரியில் இருந்து லாரியின் அளவை விட அதிக அளவில் சவ்வுடு மண் ஏற்றும் லாரிகளின் ஓட்டுநர்கள் லாரியில் தார்ப்பாய் போட்டு மூடாமல் எடுத்துச்செல்கின்றனர்.
இதனால் லாரிகளில் கொண்டு செல்லப்படும் சவ்வுடு மண் சாலையில் கொட்டி வருவதால், லாரிகளுக்கு பின்னால் செல்லும் வாகன ஓட்டிகள் விபத்தில் சிக்கும் அபாயம் ஏற்படுகிறது. அதேபோல் சாலையில் சிதறும் மண் துகள்களால் இருசக்கர வாகன ஓட்டிகள் மற்றும் பொதுமக்களுக்கு கண் எரிச்சல் ஏற்பட்டு சிரமத்திற்குள்ளாகி வருகின்றனர். 
இதனால் சவ்வுடு மண் ஏற்றிச் செல்லும் லாரிகளில் முறையாக தார்ப்பாய் கொண்டு மூடி எடுத்துச் செல்ல வேண்டும் என்றும், அளவுக்கு அதிகமான மண் எடுத்துச் செல்லும் லாரிகள் மீது போலீஸார் நடவடிக்கை எடுக்க வேண்டும் என்றும் கோரிக்கை எழுந்துள்ளது.