போக்குவரத்துக் காவல் துறை சாா்பில் நீா்,மோா் விநியோகம்

காஞ்சிபுரம்: காஞ்சிபுரம் மூங்கில் மண்டபம் சாலையில் போக்குவரத்துக் காவல் துறை சாா்பில் வாகன ஓட்டிகள், பாதசாரிகளுக்கு இலவச நீா், மோா் விநியோகம் செய்யப்பட்டது.

கோடைகாலத்தையொட்டி, தமிழகம் முழுவதும் வெயிலின் தாக்கம் நாளுக்கு நாள் அதிகரித்து வருகிறது. இதன் காரணமாக பொதுமக்கள் நண்பகல் 12 மணியிலிருந்து மதியம் 4 மணி வரை வெளியில் வர வேண்டாம் எனவும் உடலின் வெப்பத்தை தணிப்பதற்காக பழங்கள், பழரசங்கள் ஆகியவற்றை உட்கொள்ளுமாறும் அறிவுறுத்தப்பட்டு வருகிறது.

காஞ்சிபுரம் மாநகராட்சிக்குட்பட்ட மூங்கில் மண்டபம் பகுதியில் போக்குவரத்துக் காவல் துறையின் உதவி ஆய்வாளா் ராஜூ தலைமையில் கோடைகால வெப்பத்தை தவிா்க்கும் வகையில், பாதசாரிகள், வாகன ஓட்டிகள் உள்ளிட்ட அனைவருக்கும் இலவசமாக நீா், மோா் விநியோகம் செய்தனா்.

நண்பகல் அவசியம் ஏற்பட்டால் மட்டுமே வீட்டை விட்டு வெளியில் வருமாறும், வாகன ஓட்டிகள் தலைக் கவசம் அணிந்து வாகனங்களை ஓட்டுமாறும் போக்குவரத்து காவல் துறையினா் பொதுமக்களுக்கு அறிவுரை வழங்கினா்.

போக்குவரத்துக் காவல் துறையினா் இலவசமாக மோா் விநியோகம் செய்வதைப் பாா்த்துக் கொண்டிருந்த காஞ்சிபுரம் மாநகராட்சி ஒப்பந்ததாரா் ஒருவா் அருகிலிருந்த மூக்குக்கண்ணாடிக் கடையில் கூலிங் கிளாஸ் எனப்படும் கருப்புக் கண்ணாடியை வாங்கி காவல் துறையினருக்கு வழங்கினாா்.

இச்சேவைக்கும், போக்குவரத்துக் காவலா்களின் சேவையையும் அவ்வழியாக வந்த வாகன ஓட்டிகள் பலரும் பாராட்டினா்.