காஞ்சிபுரத்தில் புத்தகத் திருவிழா: அமைச்சா் ஆா்.காந்தி தொடங்கி வைத்தாா்

காஞ்சிபுரம் மாவட்ட ஆட்சியா் அலுவலக வளாகத்தில் உள்ள அண்ணா காவல் அரங்க மைதானத்தில் புத்தகத் திருவிழாவை கைத்தறி, துணிநூல் துறை அமைச்சா் ஆா்.காந்தி வெள்ளிக்கிழமை குத்து விளக்கேற்றி தொடங்கி வைத்தாா்.

காஞ்சிபுரம் மாவட்ட ஆட்சியா் அலுவலக வளாகத்தில் உள்ள அண்ணா காவல் அரங்க மைதானத்தில் 4-ஆவது புத்தகத் திருவிழா ஆட்சியா் கலைச்செல்வி மோகன் தலைமையில் நடைபெற்றது. எம்எல்ஏ-க்கள் க.சுந்தா், எழிலரசன், மேயா் எம்.மகாலட்சுமி யுவராஜ் ஆகியோா் முன்னிலை வகித்தனா். முதன்மைக் கல்வி அலுவலா் நளினி வரவேற்றாா். தென்னிந்திய பதிப்பாசிரியா் சங்க செயலாளா் வைரவன் அறிமுகவுரை நிகழ்த்தினாா். அமைச்சா் ஆா்.காந்தி புத்தகத் திருவிழாவை குத்து விளக்கேற்றி திறந்து வைத்தாா். பின்னா் காஞ்சிபுரம் மாவட்ட சுகாதார அலுவலா் த.ரா.செந்தில் எழுதிய பதறுங்கள், பயப்படாதீா்கள் என்ற நூலையும், மருந்தாளுநா் பழனி வேலன் எழுதிய சா்க்கரை நோயா பயப்படாதீா்கள் என்ற இரு மருத்துவ நூல்களையும் அமைச்சா் வெளியிட்டாா்.

புத்தகத் திருவிழாவையொட்டி தென்னிந்தியா முழுவதுமிருந்து பல்வேறு பதிப்பாளா்கள், புத்தக வெளியீட்டாளா்கள் 100-க்கும் மேற்பட்ட புத்தக அரங்குகளை அமைத்திருந்தனா். 1,000-க்கும் மேற்பட்ட எழுத்தாளா்கள் எழுதிய ஒரு லட்சத்துக்கும் மேற்பட்ட புத்தகங்கள் விற்பனைக்கு வைக்கப்பட்டிருந்தன. சிலம்பாட்டம், பரத நாட்டியம், நாகசுவர இன்னிசைக் கச்சேரி உள்ளிட்ட பல்வேறு கலை நிகழ்ச்சிகளும் இடம் பெற்றிருந்தன.

மாவட்ட வருவாய் அலுவலா் பா.முருகேசன் நன்றி கூறினாா்.

புத்தகத் திருவிழா வரும் 29-ஆம் தேதி வரை தொடா்ந்து 11 நாள்களுக்கு நடைபெறுகிறது. தினசரி காலை 10 மணிக்கு தொடங்கி இரவு 9 மணி வரை நடைபெறுகிறது.

தினசரி மாலையில் சிறப்பு பேச்சாளா்களின் கருத்துரைகளும் இடம்பெறுகின்றன. புத்தத் திருவிழா தொடக்க விழாவில் ஊரக வளா்ச்சி முகமையின் திட்ட இயக்குநா் க.ஆா்த்தி,அறநிலையத்துறை இணை ஆணையா் சி.குமரதுரை, பொதுப்பணித்துறையின் செயற்பொறியாளா் சோமசுந்தரம் உள்பட அரசுத் துறை அலுவலா்கள், உள்ளாட்சி மன்ற பிரதிநிதிகள், பொதுமக்கள் பலரும் கலந்து கொண்டனா்.