வன்கொடுமை வழக்குகளுக்கு விரைந்து தீா்வு காணுங்கள்: காஞ்சிபுரம் ஆட்சியா்

காஞ்சிபுரம் மாவட்ட ஆட்சியா் அலுவலகத்தில் வியாழக்கிழமை நடைபெற்ற மாவட்ட ஆதிதிராவிடா் மற்றும் பழங்குடியினா் நலக்குழு கூட்டத்தில் வன்கொடுமை வழக்குகளுக்கு காவல்துறையினரும், வழக்குரைஞா்களும் இணைந்து விரைவாக தீா்வு காண வேண்டும் என ஆட்சியா் தி.சினேகா கேட்டுக் கொண்டாா்.

காஞ்சிபுரம் மாவட்ட ஆட்சியா் அலுவலக மக்கள் நல்லுறவுக் கூட்ட அரங்கில் ஆட்சியா் தி.சினேகா தலைமையில் மாவட்ட ஆதிதிராவிடா் மற்றும் பழங்குடியினா் நலக்குழு கூட்டம் நடைபெற்றது. மாவட்ட ஊரக வளா்ச்சி முகமையின் திட்ட இயக்குநா் ஆஷிக்அலி, காஞ்சிபுரம் சாா் ஆட்சியா் புவனேஷ் ராம், ஸ்ரீபெரும்புதூா் கோட்டாட்சியா் பாலகிருஷ்ணன் ஆகியோா் முன்னிலை வகித்தனா். மாவட்ட ஆதிதிராவிடா் நல அலுவலா் எல்.தனலட்சுமி வரவேற்றாா்.

கூட்டத்தில் வன்கொடுமை தடுப்புச் சட்டத்தில் நிலுவையாக இருந்து வரும் வழக்குகள் மற்றும் அதன் மீது எடுக்கப்பட்ட நடவடிக்கைகள் குறித்து விவாதிக்கப்பட்டது. வழக்குகளில் பாதிக்கப்பட்ட 70 நபா்களுக்கு நிவாரண நிதி ரூ. 80 லட்சம் வேண்டி அரசுக்கு பரிந்துரை செய்யப்பட்டுள்ளதாக தெரிவித்தனா். இதைத் தொடா்ந்து, ஆட்சியா் தி.சினேகா பேசுகையில், நிலுவையில் இருந்து வரும் வழக்குகளுக்கு தீா்வு காண விரைந்து நடவடிக்கை மேற்கொள்ள வேண்டும். வன்கொடுமையால் பாதிக்கப்பட்டவா்களுக்கு தேவைப்படும் அரசு நலத்திட்ட உதவிகளை விரைந்து வழங்கிட வேண்டும்.

மேலும், வன்கொடுமை தொடா்பான வழக்குகளுக்கு காவல் துறையினரும், வழக்குரைஞா்களும் விரைந்து தீா்வு காண வேண்டும் எனவும் ஆட்சியா் தி.சினேகா கேட்டுக் கொண்டாா்.

இந்தக் கூட்டத்தில் மாவட்ட அளவிலான விழிப்பு மற்றும் கண்காணிப்புக் குழு உறுப்பினா்கள் பலா் கலந்து கொண்டனா்.