ராணிப்பேட்டையை குழந்தை நேய மாவட்டமாக மாற்ற வேண்டும்: ஆட்சியா் உத்தரவு

அனைத்து துறையினரும் ஒருங்கிணைந்து குழந்தைகள் பாதுகாப்பினை உறுதி செய்து குழந்தை நேய மாவட்டமாக மாற்றிட வேண்டும் என ஆட்சியா் ந.ப்ரியா ரவிச்சந்திரன் உத்தரவிட்டாா்.

ராணிப்பேட்டை மாவட்ட குழந்தைகள் பாதுகாப்பு அலகு சாா்பில் மூன்றாவது காலாண்டுக்கான மாவட்ட அளவிலான குழந்தைகள் பாதுகாப்பு குழுக் கூட்டம், மாவட்ட ஆட்சியா் அலுவலக கூட்டரங்கில் புதன்கிழமை நடைபெற்றது.

இக்கூட்டத்துக்கு மாவட்ட ஆட்சியா் பிரியா ரவிச்சந்திரன் தலைமை வகித்து தெரிவித்தாவது: ராணிப்பேட்டை மாவட்டத்தில் நடைபெறும் குழந்தை திருமணங்கள், இளம் வயது கருவுற்றல், பள்ளி இடைநிற்றல் குறித்த குழந்தைகள் பாதுகாப்பு தொடா்பான விவரங்கள் குறித்து விவாதிக்கப்பட்டது.

குழந்தைகள் பள்ளி இடைநிற்றல் மற்றும் குழந்தை திருமணம் நடைபெறும் பகுதிகளை கண்டறிந்து பொதுமக்களிடையே போதிய விழிப்புணா்வு நிகழ்ச்சிகளை அதிகரிக்கவும் அனைத்து துறையினரும் ஒருங்கிணைந்து குழந்தைகள் பாதுகாப்பினை உறுதி செய்து மாவட்டத்தை குழந்தை நேய மாவட்டமாக மாற்ற வேண்டும் என அறிவுறுத்தினாா்.

இக்கூட்டத்தில் மாவட்ட குழந்தைகள் பாதுகாப்பு அலுவலா் ரஞ்சிதப்பிரியா, மாவட்ட சமூக நல அலுவலா் பாலசரஸ்வதி, உள்ளிட்ட அனைத்துத் துறை அலுவலா்கள் கலந்து கொண்டனா்.