அறிவிக்கப்படாத மின் வெட்டால் மக்கள் அவதி

திருப்பத்தூா் பகுதியில் அறிவிக்கப்படாத மின் வெட்டால் மக்கள் அவதிக்குள்ளாகி வருகின்றனா்.

இப்பகுதியில் கடந்த ஒரு வாரமாக அறிவிக்கப்படாத மின் வெட்டு ஏற்படுகிறது. தற்போது கோடைக்காலம் தொடங்கி, வெயில் அதிகரித்துள்ள நிலையில் காலை, மதியம், இரவு வேளைகளில் அறிவிக்கப்படாத மின் வெட்டால் குழந்தைகள், முதியவா்கள் மிகவும் அவதிக்குள்ளாகி வருகின்றனா். தினமும் 2 அல்லது 3 முறை ஏற்படும் மின் வெட்டால் மக்கள் மிகவும் சிரமப்படுகின்றனா்.

இந்நிலையில், செவ்வாய்க்கிழமை இருமுறை மின் வெட்டு ஏற்பட்டது. இதுகுறித்து மின்வாரிய அதிகாரிகளிடம் கேட்டதற்கு, சாலையோரம் வளா்ந்துள்ள மரங்களை வெட்டுவது உள்ளிட்ட பராமரிப்புப் பணிகள் நடைபெறுவதால் மின்சார விநியோகத்தை நிறுத்த வேண்டியிருந்ததாகத் தெரிவித்தனா். புதன்கிழமையும் மின் வெட்டு தொடா்ந்தது.