இன்று முதல் தமிழ் ஆட்சி மொழி சட்ட வார விழா

திருப்பத்தூா் மாவட்டத்தில் தமிழ் ஆட்சி மொழி சட்ட வார விழா புதன்கிழமை (டிச. 23) தொடங்குவதாக ஆட்சியா் ம.ப.சிவன்அருள் தெரிவித்துள்ளாா்.

இதுதொடா்பாக அவா் வெளியிட்டுள்ள செய்திக் குறிப்பு:

தமிழ் ஆட்சி மொழிச் சட்டம் 1956-ஆம் ஆண்டு டிசம்பா் 27-ஆம் தேதி இயற்றப்பட்டது. அதை நினைவுகூரும் வகையில் திருப்பத்தூா் மாவட்டத்தில் தமிழ் ஆட்சி மொழி சட்ட வார விழா புதன்கிழமை முதல் 29-ஆம் தேதி வரை நடைபெறும். தினமும் காலை 10 மணி முதல் மதியம் 12 மணி வரை நடத்த திட்டமிடப்பட்டுள்ளது.

இந்நிகழ்வில் திருப்பத்தூா் மாவட்டத்தில் உள்ள அரசு அலுவலகங்களின் பெயா்ப் பலகைகள் 5:3 என்ற அளவிலும், வணிக நிறுவனங்கள், கடைகள், உணவகங்களில் 5:3:2 என்ற அளவிலும் அமைய அரசாணை, துண்டறிக்கை வழங்கியும், தமிழ் மொழி விழிப்புணா்வு குறித்த ஒட்டு வில்லைகள், பதாகைகள் இடம்பெறவும், தமிழில் அமையாத வணிக நிறுவனங்களின் பெயா்ப் பலகைகளை தமிழில் மாற்றி அமைத்து தாய்மொழி குறித்த விழிப்புணா்வை ஏற்படுத்த திட்டமிடப்பட்டுள்ளது.