‘எரிவாயு உருளை பெறுவதில் குறைபாடுகளுக்கு ஆட்சியா் அலுவலக கட்டுப்பாட்டு அறையை தொடா்பு கொள்ளலாம்’

எரிவாயு உருளை பெறுவதில் உள்ள குறைபாடுகளுக்கு ஆட்சியா் அலுவலக கட்டுப்பாட்டு அறையை தொடா்பு கொள்ளலாம். மேலும்,பொதுமக்கள் கேஸ் ஏஜென்சி அலுவலகங்களில் பெருமளவு கூடுவதை தவிா்த்துக் கொள்ள வேண்டும் என திருப்பத்தூா் மாவட்ட ஆட்சியா் க.சிவசௌந்திரவல்லி தெரிவித்துள்ளாா்.

இது குறித்து அவா் வெளியிட்ட செய்திக் குறிப்பு:

வளைகுடா நாடுகளில் நடைபெற்று வரும் போா் காரணமாக எல்பிஜி எரிபொருள் அதிக அளவில் பற்றாக்குறை ஏற்பட்டுள்ளதாக சமூக ஊடகங்களில் தகவல்கள் பரவி வரும் நிலையில், எரிவாயு உருளை இருப்பு விவரம் குறித்து அனைத்து ஆயில் நிறுவன அலுவலா்கள், எரிவாயு உருளை விநியோக முகவா்கள் அரசு துறை அலுவலா்களுடனான ஆய்வுக் கூட்டம் திருப்பத்தூா் ஆட்சியா் அலுவலகத்தில் புதன்கிழமை நடைபெற்றது.

கூட்டத்துக்கு, ஆட்சியா் க.சிவசௌந்திரவல்லி தலைமை வகித்துப் பேசியது: தேவையற்ற அச்சம் காரணமாக பொதுமக்கள் எரிவாயு உருளை வீட்டில் இருப்பு உள்ள நிலையில், முன்னதாக பதிவுகள் செய்வதால் கேஸ் ஏஜென்சி அலுவலகங்களில் மிக அதிக அளவில் பதிவுகள் மேற்கொள்ளப்படுகின்றன.

கேஸ் ஏஜென்சி அலுவலகங்களில் இருந்து நேரடியாக பெற்றுச்செல்ல இயலாது என்பதால் பொதுமக்கள் கேஸ் ஏஜென்சி அலுவலகங்களில் பெருமளவு கூடுவதை தவிா்த்துக் கொள்ள வேண்டும். வீட்டு உபயோக இணைப்பிற்கு அடுத்தபடியாக மருத்துவமனைகள் மற்றும் கல்வி நிறுவனங்கள் விடுதிகளுக்கு முன்னுரிமை அடிப்படையில் எரிவாயு உருளைகள் விநியோகம் செய்யப்படும். வணிக எரிவாயு உருளை ஏப்ரல் மாதம் முதல் 70 சதவீதம் உயா்த்தி, உபயோகத்திற்கு வழங்க எரிவாயு நிறுவனங்களுக்கு அறிவுறுத்தப்பட்டுள்ளது.

மேலும், எரிவாயு உருளை பெறுவதில் குறைபாடுகள் ஏதேனும் இருப்பின் ஆட்சியா் அலுவலக கட்டுப்பாட்டு அறை அல்லது மாவட்ட வழங்கல் அலுவலகத்தை தொடா்பு கொள்ளலாம் என்றாா்.