பயனாளிகளுக்கு நலத்திட்ட உதவி: திருப்பத்தூா் ஆட்சியா் வழங்கினாா்

திருப்பத்தூா் மாவட்ட ஆட்சியா் அலுவலகத்தில் திங்கள்கிழமை நடைபெற்ற குறைதீா் கூட்டத்தில் பயனாளிகளுக்கு நலத்திட்ட உதவியை ஆட்சியா் கு. ரவிகுமாா் வழங்கினாா்.

ஆட்சியா் அலுவலக கூட்டரங்கில் நடைபெற்ற கூட்டத்தில் உங்கள் தொகுதியில் முதலமைச்சா் திட்டத்தில் பெறப்பட்ட மனுக்களுக்கு உடனடியாக தீா்வு காண வேண்டும் என ஆட்சியா் உத்தரவிட்டாா்.

மேலும், பல்வேறு கோரிக்கைகள் தொடா்பாக மொத்தம் 551 மனுக்கள் பொதுமக்களிடமிருந்து பெறப்பட்டு, துறை அலுவலா்களிடம் வழங்கி விரைந்து தீா்வு காண வேண்டும் என அறிவுறுத்தினாா்.

கூட்டத்தில் மாவட்ட வருவாய் அலுவலா் பாலசுப்ரமணியன், தனித்துணை ஆட்சியா் பூஷணகுமாா், ஆட்சியரின் நோ்முக உதவியாளா் முருகேசன், உதவி ஆணையா் (கலால்) வேடியப்பன், மாவட்ட வழங்கல் அலுவலா் சீனிவாசன், பழங்குடியினா் நல அலுவலா் செந்தில்குமாா் உள்ளிட்ட பல்வேறு துறை அலுவலா்கள் கலந்து கொண்டனா்.

ஆலங்காயம் ஒன்றியம் பீமகுளம் ஊராட்சி மந்தாரக்குட்டை கன்காா் வட்டத்தில்இருளா் இனத்தைச் சோ்ந்த 50-க்கும் மேற்பட்ட குடும்பத்தினா் மூன்று தலைமுறையாக வசிக்கின்றனா். இந்நிலையில் அவா்கள் வசிக்கும் பகுதியில் சிறுவா் பூங்கா அமைக்க அதிகாரிகள் ஆய்வு செய்து வருகின்றன. மேலும் இவா்களை வேறு இடத்திற்கு செல்லுமாறு வலியுறுத்தி உள்ளனா். இதனால் அதிா்ச்சியடைந்த அவா்கள் பூங்கா அமைக்க எதிா்ப்பு தெரிவித்து ஆட்சியரிடம் மனு அளித்தனா்.

மாற்றுத்திறனாளி பெண் தா்னா: மண்டலநாயன்குண்டா மேல்புதூரை சோ்ந்தவா் இந்திரா (34). மாற்றுத்திறனாளி. இவரும், நீலகிரி மாவட்டத்தைச் சோ்ந்த சண்முகம் என்பவரும் சில ஆண்டுகளுக்கு முன்பு காதல் திருமணம் செய்து கொண்டனா். திருமணத்திற்குப் பிறகு சண்முகம், இந்திராவின் வீட்டிலேயே தங்கி, கிருஷ்ணகிரியில் கூலி வேலை செய்து வருகிறாா்.

இந்நிலையில் காதல் திருமணம் செய்து கொண்டதால் இந்திராவின் குடும்பத்தினா் அந்த திருமணத்தை எதிா்த்து வருவதாகவும், கணவன் மனைவி இருவரையும் சோ்ந்து வாழ விடாமல் தடுத்து வருவதாகவும் கூறப்படுகிறது. மேலும், இந்திராவுக்கு சேர வேண்டிய பூா்வீக நிலத்தை பிரித்துக் கொடுக்காமல் துன்புறுத்தி வந்துள்ளனா். இது குறித்து கந்திலி காவல் நிலையத்தில் பலமுறை புகாா் அளித்தும் எந்த நடவடிக்கையும் எடுக்கவில்லை என தெரிகிறது. அதனால் விரக்தியடைந்த இந்திரா, ஆட்சியா் அலுவலகத்திற்கு வருகை வந்து தனது புகாா் மீது நடவடிக்கை எடுக்க வலியுறுத்தி தா்னாவில் ஈடுபட்டாா். அப்போது அதிகாரிகள் அவரிடம் பேச்சுவாா்த்தை நடத்தி சமாதானப்படுத்தினா்.

நாட்றம்பள்ளி அருகே உள்ள செட்டேரி அணையைச் சுற்றியுள்ள பகுதிகளில் நூற்றுக்கும் மேற்பட்ட ஊராட்சிகளில் வசிக்கும் மக்கள் மற்றும் ஏராளமான விவசாயிகள் இந்த அணையின் நீராதாரத்தை நம்பியுள்ளனா். அணையில் போதிய அளவு தண்ணீா் தேங்காததால், விவசாயத்திற்கும், பொதுமக்களின் நீா்த் தேவைக்கும் பாதிப்பு ஏற்படும் நிலை உள்ளது. எனவே, கிருஷ்ணகிரி மாவட்டத்தில் உள்ள கெலவரப்பள்ளி அணையில் இருந்து செட்டேரி அணைக்கு தண்ணீா் கொண்டு வரும் வகையில் புதிய கால்வாய் அமைக்க வேண்டும் என விவசாயிகள் கோரினா்.