சிறுவனுக்கு மயக்க மருந்து கொடுத்து நகை திருடு போனதாக நாடகமாடிய தாய்

வாணியம்பாடி: வாணியம்பாடியில் சிறுவனுக்கு மயக்க மருந்து கொடுத்து நகை திருடு போனதாக தாய் நாடகமாடியது போலீஸாா் விசாரணையில் அம்பலமானது.

திருப்பத்தூா் மாவட்டம், வாணியம்பாடி ஷாகிராபாத் பகுதியைச் சோ்ந்த ஷகீல் அஹ்மத். இவரது மனைவி ஷாஹீன் பா்வீன். இந்நிலையில் ஞாயிற்றுக்கிழமை வீட்டில் யாரும் இல்லாத நேரத்தில் மா்மநபா் தனது 10 வயது மகன் மீது மயக்க மருந்து தெளித்து, பீரோவில் வைத்திருந்த 7 பவுன் நகை மற்றும் ரூ.70,000 ரொக்கத்தை திருடிச் சென்று விட்டதாக வாணியம்பாடி நகர காவல் நிலையத்தில் புகாா் அளித்தனா்.

இதையடுத்து வாணியம்பாடி டிஎஸ்பி மகாலட்சுமி தலைமையிலான போலீஸாா் சென்று தீவிர விசாரணை நடத்தினா். மேலும், வீட்டின் அருகே பொருத்தப்பட்டிருந்த கண்காணிப்பு கேமரா காட்சிகளை ஆய்வு செய்தனா். அதில் சம்பவ நேரத்தில் சந்தேகப்படும் வகையில் யாரும் வீட்டில் வந்து சென்ற்கான காட்சிகள் எதுவும் பதிவாகவில்லை. இதையடுத்து, சந்தேகம் அடைந்த போலீஸாா், ஷாஹீன்பா்வீனிடம் தீவிர விசாரணை நடத்தினா். விசாரணையில் பீரோவில் இருந்த நகைகளை எடுத்துச் சென்று அடகு கடையில் அடகு வைத்ததும், பணத்தை உறவினா் ஒருவருக்கு அனுப்பியதும் தெரிய வந்தது.

இதையடுத்து, மகனை வைத்து கொள்ளை போனதாக நாடகமாடியதாக ஷாஹீன்பா்வீன் மீது வழக்குப்பதிவு செய்த போலீஸாா் அவரிடம் விசாரணை நடத்திய பின்னா் அவரை விடுவித்தனா். இந்த சம்பவத்தால் வாணியம்பாடி பகுதியில் பரபரப்பு ஏற்பட்டது.