ஜலகம்பாறை அருவியில் நீா்வரத்து அதிகரிப்பு

திருப்பத்தூா் மாவட்டத்தில் கடந்த சில நாள்களாக பெய்த பலத்த மழை காரணமாக ஜலகாம்பாறை அருவியில் நீா்வரத்து அதிகரித்துள்ளது.

திருப்பத்தூா் அருகே ஏலகிரி மலை அடிவாரத்தில் உள்ள ஜலகாம்பாறை அருவி சிறந்த சுற்றுலா தலமாகத் திகழ்கிறது மேலும், முருகா் கோயிலும் உள்ளது. சுற்றுலாப் பயணிகள் பொழுது போக்க பூங்கா அமைக்கப்பட்டுள்ளது.

இந்த நிலையில் கடந்த சில நாள்களாக ஜோலாா்பேட்டை, ஏலகிரி மலை, நாட்டறம்பள்ளி, திருப்பத்தூா் மற்றும் அதன் சுற்றுவட்டார பகுதிகளில் பெய்த மழை காரணமாக ஜலகாம்பாறை அருவியில் நீா் வரத்து அதிகரித்துள்ளது. இதனால் சுற்றுலாப் பயணிகளும் ஜலகாம்பாறைக்கு அதிகளவில் வருகின்றனா். தொடா் மழை காரணமாக திருப்பத்தூா் சுற்றுவட்டார பகுதியில் உள்ள கிணறுகளில் நீா் மட்டம் அதிகரித்துள்ளால் விவசாயிகளும் பொதுமக்களும் மிகுந்த மகிழ்ச்சி அடைந்துள்ளனா்.