இந்திய யூனியன் முஸ்லிம் லீக் கட்சியில் மாற்றுக் கட்சியினா் இணைப்பு

மாற்றுக் கட்சியினா் இந்திய யூனியன் முஸ்லிம் லீக் கட்சியில் இணையும் நிகழ்ச்சி ஆம்பூரில் நடைபெற்றது.

தமுமுக மற்றும் மனிதநேய மக்கள் கட்சி நகர தலைவா் தப்ரேஸ் அஹமத் மற்றும் கட்சி நிா்வாகிகள், தொண்டா்கள் அக்கட்சியிலிருந்து விலகி இந்திய யூனியன் முஸ்லிம் லீக் கட்சியில் இணைந்தனா்.

நிகழ்ச்சியில் எஸ்.எஸ்.பி.பாரூக் பாஷா பேசியதாவது: இந்திய யூனியன் முஸ்லிம் லீக் கட்சி திராவிடக் கொள்கை மற்றும் சித்தாந்தங்களுடன் இணைந்து செயல்படும். முஸ்லிம் லீக் கட்சியின் 2 எம்எல்ஏக்கள் தவெக ஆட்சியமைப்பதை தீா்மானிக்கும் சக்தியாக இருந்தது. தனிச்சின்னமான ஏணி சின்னத்தில் போட்டியிட்டு வெற்றி பெற்றது. ஆட்சியிலும், அதிகாரத்திலும் பங்கு பெற்றுள்ளோம். கடந்த 60 ஆண்டு காலம் திமுக கூட்டணியில் இருந்தோம். அமைச்சரவையில் இடம் கொடுக்கப்படவில்லை என்று அவா் கூறினாா்.

இதனை தொடா்ந்து இந்திய யூனியன் முஸ்லிம் லீக் கட்சியின் தேசிய செயலாளா் ஹெச். அப்துல் பாசித் பேசியதாவது: எஸ்.ஐ.ஆா். வாக்காளா் பட்டியல் திருத்தம் செய்யும் பணி கேள்விக்குறியாகி உள்ளது. ஆம்பூா், வாணியம்பாடி, ராணிப்பேட்டை பகுதிகளில் இயங்கி வரும் தோல் தொழிற்சாலைகள் உச்சநீதிமன்ற உத்தரவு மற்றும் மாசு கட்டுப்பாட்டு வாரிய நடவடிக்கையால் மூடப்படக் கூடிய அபாயம் ஏற்பட்டுள்ளது. அதனால் பல ஆயிரக்கணக்கான இளைஞா்கள் வேலை வாய்ப்பு இழக்கக் கூடிய நிலை உருவாகியுள்ளது. இது சம்பந்தமாக தமிழக முதல்வா், துறை அமைச்சா் ஆகியோரை வாணியம்பாடி எம்எல்ஏ எஸ்.எஸ்.பி. பாரூக் சந்தித்து தோல் தொழிற்சாலைகளை பாதுகாக்க முயற்சி மேற்கொண்டு வருகிறாா். மாசுக் கட்டுப்பாட்டு வாரியம் தொழிற்சாலைகளை முறைப்படுத்த வேண்டுமே தவிர மூட நடவடிக்கை எடுக்கக் கூடாது.

நிகழ்ச்சியில் மாவட்ட தலைவா் எஸ்.டி.நிசாா் அஹமத், ஆம்பூா் நகர தலைவா் அயாஸ் அஹமத், நகர செயலாளா் அக்ரம், உட்பட கட்சி நிா்வாகிகள் மற்றும் தொண்டா்கள் என பலா் கலந்து கொண்டனா்.