வீட்டின் பூட்டை உடைத்து 40 பவுன் நகைகள் திருட்டு

விவசாயி வீட்டின் பூட்டை உடைத்து 40 பவுன் தங்க நகைகளை மர்ம நபர்கள் திருடிச் சென்றனர்.

திருத்தணி நகராட்சிக்கு உள்பட்ட குமாரகுப்பம் முதல் தெருவில் வசிப்பவர் கிரி (50). விவசாயி. இவர் சனிக்கிழமை மாலை வீட்டை பூட்டி விட்டு குடும்பத்துடன் சென்னையில் உள்ள மகளின் வீட்டுக்குச் சென்றிருந்தார்.

திங்கள்கிழமை அவரது வீட்டின் பின்பக்கக் கதவு உடைக்கப்பட்டிருப்பதைப் பார்த்த அக்கம்பக்கத்தினர் அதுகுறித்து கிரிக்கும், திருத்தணி போலீஸாருக்கும் தகவல் தெரிவித்தனர்.

பின்னர் போலீஸார் விசாரணையில் பீரோவில் இருந்த 40 பவுன் நகைகளை மர்ம நபர்கள் திருடிச் சென்றிருப்பது தெரியவந்தது.

மேலும் கைரேகை நிபுணர்கள் சென்று தடயங்களைப் பதிவு செய்தனர். இதுகுறித்து திருத்தணி போலீஸார் வழக்குப் பதிந்து விசாரித்து வருகின்றனர்.