வீட்டின் பூட்டை உடைத்து 25 பவுன் நகைகள் திருட்டு

குன்றத்தூர் அருகே வீட்டின் பூட்டை உடைத்து 25 புவுன் நகைகள், ரூ.4 ஆயிரம் ரொக்கத்தை திருடிச் சென்ற மர்ம நபர்களை போலீஸார் தேடி வருகின்றனர்.

இதுகுறித்து போலீஸ் தரப்பில் கூறப்பட்டதாவது:

குன்றத்தூர் மேத்தா நகர் பகுதியைச் சேர்ந்தவர் மதியழகன் (47). தனியார் நிறுவன ஊழியர். இவரது மனைவி நர்மதா (40). தனியார் பள்ளி ஆசிரியர். இருவரும் வெள்ளிக்கிழமை காலையில் பணிக்குச் சென்று விட்டனர்.

இவர்களது மகள் ஸ்ரீமதியும் வீட்டைப் பூட்டி விட்டு பள்ளிக்குச் சென்றார். மாலையில் பள்ளி முடிந்து ஸ்ரீமதி வீடு திரும்பியபோது, வீட்டின் பூட்டு உடைக்கப்பட்டும், உள்ளே பீரோவும் உடைக்கப்பட்டிருப்பதைக் கண்டு அதிர்ச்சியடைந்தார்.

இதுகுறித்து குன்றத்தூர் போலீஸாருக்குத் தகவல் தெரிவிக்கப்பட்டது. போலீஸார் நிகழ்விடத்துக்குச் சென்று விசாரணை மேற்கொண்டதில், பீரோவில் இருந்த 25 பவுன் நகைகள், ரூ.4 ஆயிரம் ரொக்கம் ஆகியவை கொள்ளையடிக்கப்பட்டது தெரியவந்தது. இதுகுறித்து போலீஸார் வழக்குப் பதிவு செய்து குற்றவாளிகளைத் தேடிவருகின்றனர்.