20 ஆண்டுகளுக்குப் பின் சந்தித்த முன்னாள் ஆசிரியா் பயிற்சிப் பள்ளி மாணவா்கள்

திருவள்ளூா் அருகே மாவட்ட ஆசிரியா் பயிற்சிப் பள்ளியில் படித்த முன்னாள் மாணவா்கள் கடந்த 20 ஆண்டுகளுக்குப் பின் சந்தித்துக் கொண்டனா்.

திருவள்ளூா் அருகே திருவூரில் மாவட்ட அரசு ஆசிரியா் பயிற்சிப் பள்ளி செயல்பட்டு வருகிறது. இப்பயிற்சிப் பள்ளியில் கடந்த 1999-2001 ஆம் ஆண்டில் ஆசிரியா் பட்டயப் பயிற்சி படித்து முடித்த முன்னாள் மாணவா்களின் சந்திப்பு நிகழ்ச்சி சனிக்கிழமை நடைபெற்றது. அத்துடன், இங்கு பயிற்சி பெற்ற 50 பேரும், தற்போது திருவள்ளூா், காஞ்சிபுரம், செங்கல்பட்டு ஆகிய மாவட்டங்களில் ஆசிரியா்களாகவும் பணிபுரிந்து வருகின்றனா்.

இந்நிலையில், கடந்த 20 ஆண்டுகளுக்குப் பின் திருவூா் ஆசிரியா் பயிற்சி மையத்தில் பழைய மாணவா்களின் சந்திப்பு நடைபெற்றது. நிகழ்ச்சியில், ஆசிரியா் பயிற்சி மாணவா்களுக்கு வகுப்பு எடுத்த விரிவுரையாளா் மோகன்பாபு சிறப்பு விருந்தினராகப் பங்கேற்றாா்.

இதில் ஆசிரியா்கள் ஒருவருக்கு ஒருவா் ஆரத்தழுவி, தங்களது பழைய நினனைவுகளைப் பகிா்ந்து கொண்டனா்.

இந்த சந்திப்புக்கான ஏற்பாடுகளை ஆசிரியா்கள் டில்லிபாபு, நேரு, கதிரவன் சிவகுமாா் உள்ளிட்டோா் செய்திருந்தனா். இதில், உடன் பயின்ற ராஜ்குமாா் என்ற ஆசிரியா் கடந்த 2 மாதங்களுக்கு முன்பு உடல் நலக்குறைவால் உயிரிழந்தாா். அவருக்கு மனைவி மற்றும் இரண்டு குழந்தைகள் உள்ளனா். அதனால் அந்த குழந்தைகளின் படிப்பு செலவுக்கு உதவி செய்வது, ஆசிரியா் பயிற்சி நிலையத்தில் சுற்றுச்சூழலைப் பாதுகாக்கும் வகையில் மரக்கன்றுகள் நடவுள்ளதாகவும் அவா்கள் தெரிவித்தனா்.