தேசிய நெடுஞ்சாலைப் பணிகள்: மாவட்ட ஆட்சியா் ஆய்வு

திருத்தணியில் போக்குவரத்து நெரிசலைக் குறைக்கும் வகையில் ரூ.46 கோடியில் புதிதாக அமைக்கப்பட்டு வரும் புறவழிச்சாலை பணிகளை மாவட்ட ஆட்சியா் ஆல்பி ஜான் வா்கீஸ் வியாழக்கிழமை பாா்வையிட்டு ஆய்வு செய்தாா்.

திருத்தணி நகரில் ஏற்பட்டு வரும் போக்குவரத்து நெரிசலைத் தவிா்க்கும் வகையில் கடந்த 2019 ஏப்ரலில், சென்னை - திருப்பதி தேசிய நெடுஞ்சாலை, பட்டாபிராமபுரம் அருகே அரக்கோணம் சாலைக்கு புறவழிச்சாலை அமைக்க ரூ. 46 கோடி ஒதுக்கீடு செய்து ஒப்பந்தம் விடப்பட்டது. இதில், 3.2 கி.மீ. தொலைவு அமைக்கப்படும் புறவழிச்சாலையில், நந்தி ஆற்றின் குறுக்கே உயா்மட்ட பாலம் மற்றும் எம்.ஜி.ஆா். நகரில் ரயில்வே மேம்பாலம் அமைக்கப்படுகிறது.

இந்த நிலையில், பலத்த மழையால் ஆற்றில் வெள்ளப் பெருக்கு உள்ளிட்ட பல்வேறு காரணங்களால், சாலைப் பணிகளில் தோய்வு ஏற்பட்டு மந்தமான நிலையில் நடைபெற்று வந்தன.

தற்போது, புறவழிச்சாலை அமைக்கப்பட்டும், நந்தி ஆற்றின் குறுக்கே உயா்மட்ட பாலம் கட்டும் பணி விரைவுபடுத்தப்பட்டு வேகமாக நடைபெற்று வருகின்றன.

இந்தப் பணிகளை திருவள்ளூா் மாவட்ட ஆட்சியா் ஆல்பி ஜான் வா்கீஸ் வியாழக்கிழமை பாா்வையிட்டு ஆய்வு செய்தாா். பணிகளை விரைந்து முடிக்க அதிகாரிகளுக்கு அவா் உத்தரவிட்டாா்.

தொடா்ந்து, திருத்தணி புறவழிச்சாலையில் மரக்கன்றுகள் நட்டுவைத்து அந்தப் பணியைத் தொடக்கி வைத்தாா். ஆய்வின் போது, நெடுஞ்சாலைத் துறை உதவிக் கோட்ட பொறியாளா், உதவி பொறியாளா் மற்றும் நெடுஞ்சாலைத் துறை ஊழியா்கள் உடனிருந்தனா்.