ரூ.2.53 கோடியில் 4 சக்கர வாகன மோசடி செய்தவா் கைது

திருவள்ளூரில் ரூ.2.53 கோடி மதிப்பிலான 4 சக்கர வாகன மோசடியில் ஈடுபட்டவரை போலீஸாா் கைது செய்தனா். மேலும் அவரிடம் இருந்து 26 நான்கு சக்கர வாகனங்களை பறிமுதல் செய்தனா்.

காஞ்சிபுரம் மாவட்டம், இருங்காட்டுகோட்டையைச் சோ்ந்தவா் மணிகண்டன் (27). இவரிடம் திருவள்ளூா் மாவட்டம் கடம்பத்தூா் அருகே பிரயாங்குப்பம் கிராமத்தைச் சோ்ந்த மனோஜ் பிரபாகா் (30) என்பவா் கடந்த 11.1.2024 அன்று ஒப்பந்த அடிப்படையில் ஒரு காரை வாடகைக்கு எடுத்து சென்றாராம்.

இந்த நிலையில் அவா் காருக்கான வாடைகையும் கொடுக்காமல், வாகனத்தையும் திரும்ப கொடுக்காமல் இருந்ததாக கூறப்படுகிறது. இது தொடா்பாக கடந்த 23.3.2024-இல் மணிகண்டன் மப்பேடு காவல் நிலையத்தில் புகாா் செய்தாா். இதுகுறித்து மப்பேடு போலீஸாா் வழக்குப் பதிவு செய்து தீவிரமாக விசாரணை செயது வந்தனா்.

இந்த நிலையில், மனோஜ் பிரபாகா் தலைமறைவாக இருந்தாராம். இதைத் தொடா்ந்து திருவள்ளூா் மாவட்ட காவல் கண்காணிப்பாளா் சீனிவாச பெருமாள் உத்தரவின் பேரில் துணைக்காவல் கண்காணிப்பாளா் அழகேசன் தலைமையில் தனிப்படை அமைத்து தீவிரமாக தேடி வந்தனா்.

இந்த நிலையில் சனிக்கிழமை இரவு மணவாளநகா் காவல் ஆய்வாளா் ரவிக்குமாா், குற்றவாளியான மனோஜ் பிரபாகரை கைது செய்து விசாரித்தாா். அப்போது, இதேபோல் 57 போ்களிடம் நான்கு சக்கர வாகனங்களை வாடகைக்கு பெற்றுக் கொண்டு திரும்ப கொடுக்காமல் இருப்பது தெரிய வந்துள்ளது. மேலும் மனோஜ் பிரபாகருடன் பலருக்கும் தொடா்பு இருப்பதும் தெரியவந்துள்ளது.

இதையடுத்து மனோஜ் பிரபாகரிடமிருந்து தமிழகத்தின் பல்வேறு பகுதிகளில் பலரிடமிருந்து ஏமாற்றி எடுத்து வந்த ரூ.2.53 கோடி மதிப்பிலான 26 நான்கு சக்கர வாகனங்களை போலீஸாா் பறிமுதல் செய்தனா். அதேபோல் மீதமுள்ள 31 நான்கு சக்கர வாகனங்களை பறிமுதல் செய்ய வேண்டியுள்ளது.

மேலும், மனோஜ் பிரபாகரின் கூட்டாளிகளை தேடி வருவதாகவும் மாவட்ட காவல் துறை சாா்பில் தெரிவிக்கப்பட்டுள்ளது. இந்த நிலையில் மனோஜ் பிரபாகா் மீது போலீஸாா் வழக்குப் பதிவு செய்து திருவள்ளூா் நீதிமன்றத்தில் ஆஜா்படுத்தி சிறையில் அடைத்தனா்.